Analisti politik Imer Mushkolaj ka hedhur poshtë idenë për krijimin e një qeverie teknike në Kosovë, duke e cilësuar atë si të pamundur në rrethanat aktuale politike.
Ai në Blic Interview me Astrit Gashin, thotë se një ide e tillë nuk funksionon për shkak të dallimeve të thella ndërmjet partive.
“Unë nuk besoj në qeveri teknike – një qeveri të tipit ‘hajde të futemi të gjithë, vëllezër dhe motra’. Aq më tepër nuk e shoh të mundur që diçka e tillë të ndodhë në Kosovë. Duke marrë parasysh se partitë politike kanë mendime dhe ide të kundërta, është e pamundur që ato të bëhen bashkë,” u shpreh Mushkolaj.
Ai komentoi edhe propozimin e LDK-së për një qeveri gjithëpërfshirëse, të cilin e sheh si një përpjekje për të shmangur presionin publik dhe për të mbuluar mungesën e pozicionimit të qartë politik.
“Kjo ide që erdhi nga LDK, erdhi për ta neutralizuar presionin që vinte nga opinioni publik – se çfarë do të thotë ky pozicioni i tyre ‘as mish, as peshk’, pra as me VV-në dhe as me opozitën. Ata e prezantuan këtë si një zgjidhje të ndërmjetme, me idenë se ‘po bëhemi bashkë të gjithë dhe nuk jemi me askënd’. Prapë, për mua, ky qëndrim është problematik, sepse në fushatë ke thënë që nuk bën koalicion me VV-në, e tani po, që VV-ja të bëhet bashkë me partitë e tjera opozitare,” tha ai.
Mushkolaj përmendi raste konkrete të koalicioneve joformale në nivel lokal si dëshmi për dyfytyrësinë politike dhe mungesën e qëndrueshmërisë në parime.
“Në Prishtinë ke një koalicion joformal të PDK-së me VV-në, që zakonisht dalin kundër ideve që ka LDK-ja – ose edhe në komuna të tjera, për shembull është VV-ja që ka bërë koalicion në Gjilan me PDK-në. Pra, jemi duke folur për përpjekje të dëshpëruara për të na treguar një fotografi tjetër nga ajo që është realiteti,” shtoi ai.
Në fund, Mushkolaj theksoi se të gjitha partitë kanë shkelur parimet për të cilat janë zotuar më herët, ndërsa retorika për “parime” nuk është më e besueshme për publikun.
“Secili është me secilin. Nëse kanë folur për parime, i kanë shkelur. Por duhet të shkojmë tutje dhe të mendojmë se çfarë duhet të bëhet më mirë. T’i largojnë këto tregime për parime, sepse nuk iu beson askush. Na tregojnë koalicionet lokale që kanë bërë, dhe që mund të bëjnë edhe tash në nivel qendror – por ndoshta po dëshirojnë ta tërheqin litarin deri në atë pikë, pak para se të këputet, dhe pastaj të arsyetohen për koalicionet,” përfundoi ai në Blic Interview me Astrit Gashin.
