Ministria e Bujqësisë ka marrë përsipër ta paguajë qiranë edhe për katër muaj për hapësirat, që shfrytëzoheshin nga Agjencia për Zhvillim të Bujqësisë, ndonëse zyrtarët e kësaj agjencie, nga prilli janë zhvendosur në objektin, ku më parë ishte AAK-ja.
AZHB-ja nuk e shkëputi kontratën, edhe pse ishte në dijeni se do të zhvendosej në objekt shtetëror. Nga viti 2019 e deri më tash, MBPZHR-ja e AZHB-ja i shpenzuan afro 4 milionë euro për qira.
Nga prilli, zyrtarët e Agjencisë për Zhvillimin e Bujqësisë janë zhvendosur në objektin, ku më parë ishte Aleanca për Ardhmërinë e Kosovës. Por, Ministria e Bujqësisë do të vazhdojë të paguajë nga 27 mijë e 300 euro qira mujore deri më 31 gusht për zyrat, që janë shfrytëzuar më parë nga zyrtarët e kësaj agjencie në “Lakrishtë”, raporton koha.net.
AZHB-ja nuk e shkëputi kontratën për hapësirat, që i shfrytëzonte, ani se një gjë të tillë mund ta bënte me paralajmërim prej 180 ditësh.
Në bazë të aneks-kontratës së nënshkruar më 14 prill të këtij viti, e të siguruar nga KOHA, MBPZHR-ja i ka marrë përsipër obligimet dhe përgjegjësitë, sipas kontratës bazë, ku në gusht të 2023-tës firmat ishin hedhur nga ish-drejtoresha ekzekutive e AZHB-së, Venera Çerkini, dhe kompania “A2 Group”.
Sipas këtij aneksi, të nënshkruar, po ashtu, nga Venera Çerkini, por tash në pozitën e sekretares së përgjithshme, Ministria do ta shfrytëzojë këtë hapësirë nga 1 maji deri më 31 gusht, duke i paguar kështu afro 110 mijë euro.
“Qiramarrësi i merr të gjitha obligimet dhe përgjegjësitë, sipas kontratës bazë me numër të protokollit 07/4 Nr.5352 të datës 31.8.2023, për shtërzimin e sipërfaqes së përgjithshme prej 1.560 m2 të përfshira në katet VII, VIII dhe IX me çmimin bruto prej 17.50 m2, përkatësisht 15.600 m2x17,50 euro + 27.300 euro”, thuhet në aneks-kontratë.
AZHB-ja, ani se ishte në dijeni se rinovimi i objektit, ku ndodhej AAK-ja, ishte paraparë që të përfundonte në fund të vitit të kaluar, nuk e ka shfrytëzuar mundësinë e shkëputjes së kontratës.
E, nga Ministria e Bujqësisë kanë thënë për KOHËN se ndërprerja e kontratës nga AZHB-ja nuk ishte bërë me kohë, për shkak se objekti nuk ishte funksional deri në fund të vitit 2024, ashtu siç parashihej.
“Për të siguruar vijimësi në ofrimin e shërbimeve dhe funksionimin normal të AZHB-së, është vlerësuar se do të kishte pasoja financiare dhe administrative të panevojshme, nëse do të ndërpritej kontrata pa pasur hapësira të gatshme për zhvendosje. Pas përpjekjeve të shumta u arrit që zyrtarët e AZHB-së të zhvendosen në objektin në ‘Ulpianë’ dhe menjëherë kemi ndërmarrë hapat e nevojshëm njoftues me qiramarrësin”, thuhet në përgjigjen e ministrisë.
Të pyetur se mbi çfarë baze ligjore janë marrë këto obligime, nga ky dikaster kanë thënë se një gjë e tillë nuk kërkon dispozita të veçanta, pasi Agjencia është organ në kuadër të Ministrisë dhe si e tillë operon në kuadër të buxhetit të saj.
Por, AZHB-ja sipas Ligjit për ndarje buxhetore, e ka buxhetin e saj, dhe procedurat e prokurimit i zhvillon vetë.
Ministria e Bujqësisë dhe AZHB-ja, që nga shtatori i 2019-s, kanë paguar rreth 4 milionë euro për shfrytëzim me qira të 6 kateve në ndërtesën “Ramiz Sadiku” në “Lakrishtë”.
Kontrata e parë mes Ministrisë dhe “A2 Group’ ishte nënshkruar në shtator të vitit 2019, me vlefshmëri deri më 31 gusht 2022, dhe parashihte qira prej 28 mijë e 80 euro në muaj, apo mbi 1 milionë euro në total.
Kontrata ishte vazhduar në gusht të 2022-tës, me ndryshim në çmim, duke e ulur atë në 27 mijë e 300 euro në muaj dhe me afat 1 vjeçar. Një kontratë e re ishte lidhur më pas më 2023 me afat prej dy vjetësh, konkretisht deri në gusht të 2025-s. Për këto tre vjet u shpenzuan edhe 992.800 euro.
Edhe rreth 2 milionë euro u shpenzuan për shfrytëzimin e tri kateve të të njëjtit objekt nga AZHB-ja.
Përveç kësaj, 370 mijë euro janë paguar nga buxheti i shtetit për rinovim të dy kateve të objektit, ku ishte AAK-ja, për akomodim të zyrtarëve të AZHB-së.
Krahas kësaj, rreth 280 mijë euro të tjera janë paguar nga Ministria për hartimin e projektit ideor arkitektonik për ndërtesën e re të MBPZHR-së.
