Policia e Kosovës ka realizur një aksion të suksesshëm në veri të Kosovës, ku gjatë bastisjes ka gjetur armë, municion, granata dore e zolla në një lokacion në Zveçan
“Pas pranimit të informacionit se në një lokacion të caktuar ka mundësi që të ketë armë, Policia e Kosovës ka reaguar dhe gjatë bastisjes në fshatin Vallaq, Komuna Zveçan, në një shtallë të kuajve kemi hasur në një sasi të madhe armatimi. Armët, municioni, granatat e dorës dhe Zollat janë gjetur në dy gypa të plastikës të vendosur nën tokë”, ka thënë për Veriu.info zëvëndëskomandanti i policisë për rajonin e Mitrovicës së veriut, Veton Elshani.
Ai ka bërë të ditur se gjatë bastisjes prezent ishin përpos njësive adekuate policore edhe pjesëtarë të KFORit amerikan dhe njësi monitoruese nga EULEX.
“Në vendin e ngjarjes ka dalur edhe Prokurori i rastit. Janë zhvilluar edhe 2 bastisje të tjera në dy lokacione, një në Mitrovicë Veri dhe një në Zveçan me ç’rast kemi hasur edhe në jelek antiplumb, fishekë dhe 14 kartela grafike (kundërvajtje doganore)”, ka thënë Elshani për Veriu.info.
Bëhet e ditur se në lidhje me këtë rast nuk ka persona të arrestuar, por është një person me interes për intervistim, përderisa me rastin është duke u marrur Prokuroria Themelore në Mitrovicë./Veriu.info
