Qeveria e Kosovës ditën e sotme ka nënshkruar një kontratë 3 milionëshe për ndërtimin e dy urave të reja mbi lumin Ibër në Mitrovicë. Ndërsa, pikërisht sot do të vendoset edhe gurthemeli. Në anën tjetër nga BE, ishte theksuar se nuk janë të përfshirë e as në dijeni për projektin në fjalë, duke kërkuar që veprimet të tilla të bëhen me kujdes dhe në mënyrë gjithëpërfshirëse.
Ditën e sotme (01.07.2025), në e-prokurim nga Ministria e Infrastrukturës është dhënë njoftimi se është nënshkruar kontrata për “Ndërtimi i mbikalimeve (urave) për këmbësorë dhe automjete në Mitrovicë”.
Kjo kontratë u dha në formë të negociuar, vlera e secilës është 3 milionë euro.
Ndërsa, kompania që u shpërblye është “EUROKOS HOLDING” SH.P.K.
Në anën tjetër, Zyra e Kryeministrit të Kosovës ka njoftuar se sot do të vendoset edhe gurthemeli i urave në orën 17:30.
Sipas një projekti të ilustruar nga publikoi Lëvizja Vetëvendosje në rrjetet sociale para disa kohësh, urat planifikohen të ndërtohen paralelisht me urën që aktualisht ndodhet mbi lum.
BE nuk është në dijeni të projektit
Pavarësisht thirrjeve për përmbajtje nga ana e ndërkombëtareve dhe thirrje për gjithëpërfshirje, sot do të vendoset gurthemeli.
Duke pasur parasysh shqetësimet se si mund të ndikojë një gjë e tillë, qoftë brenda vendit apo edhe në raportet e shtetit me aleatët kryesorë, por edhe për gjendjen e sigurisë në vend, ditë më parë Gazeta Express ka dërguar pyetje edhe në misionin e NATO-s, KFOR.
Nga këta të fundit, është thënë se çështja në fjalë është jashtë kompetencave të tyre, dhe se, ata janë të pranishëm mbi urën kryesore mbi lumin Ibër duke kryer patrullime të rregullta në këtë zonë.
‘‘KFOR-i mban një prani të fiksuar në urën kryesore mbi lumin Ibër dhe kryen patrullime të rregullta në zonat përreth për të siguruar një mjedis të sigurt. KFOR-i gjithashtu mban një prani të dukshme dhe fleksibile në Mitrovicën e Veriut, si dhe në të gjithë Kosovën, dhe është i gatshëm t’i përgjigjet çdo zhvillimi të rëndësishëm të sigurisë në dobi të të gjitha komuniteteve në Kosovë’’, është thënë mes tjerash në përgjigjen e KFOR-it.
Nga Bashkimin Evropian po ashtu ishte theksuar se nuk janë të përfshirë e as në dijeni për projektin në fjalë, duke kërkuar që veprimet të tilla të bëhen me kujdes dhe në mënyrë gjithëpërfshirëse.
“BE-ja as nuk është në dijeni dhe as e përfshirë në këtë projekt. Çdo vendim për ndërtimin e infrastrukturës mbi lumin Ibër duhet të merret me kujdes dhe në mënyrë gjithëpërfshirëse duke përfshirë plotësisht të gjitha komunitetet e prekura”, është thënë nga BE.
Në ceremoni do të marrin pjesë kryeministri Kurti, nënkryetari i Mitrovicës së Jugut, Arian Tahiri, kryetari i Mitrovicës së Veriut, Erden Atiq dhe ministrat Elber Krasniqi e Liburn Aliu.
