Deputetja e Lidhjes Demokratike të Kosovës, Hykmete Bajrami, ka thënë se është pezulluar tenderi për “Rehabilitimin dhe Modernizimin e Njësisë A3” në Termocentralin Kosova A, me vlerë rreth 137 milionë euro. Deputetja ka theksuar se pezullimi i këtij tenderi është bërë një ditë para afatit përfundimtar për dorëzimin e ofertave.
Bajrami ka thënë edhe se tenderi në fjalë ka ngritur dyshime për muaj më radhë dhe se i njëjti, është ‘’zhvilluar në mënyrë të dyshimtë’’.
Tutje, deputetja e LDK-së, ka folur edhe për ‘’disa nga faktet’’, duke përmendur mungesën e transparencës, ku siç ka shkruar Bajrami, tenderi u hap pa studim fizibiliteti dhe pa përshkrim teknik, duke lënë të paqartë se çfarë punësh kërkohen nga operatori ekonomik.
Po ashtu, ajo ka shtruar edhe disa pyetje lidhur me këtë çështje, duke shkruar: Pse u pezullua në momentin e fundit, kur procesi duhej të përfundonte?; 2. Po thuhet se dikush u ankua. Kush u ankua? Ku u ankua?; Me çfarë procedure ankohesh dhe ku ankohesh një ditë para kalimit të afatit për dorëzimin e ofertave?; Asnjë procedurë ankese nuk ishte paraparë në këtë kohë.
Postimi:
Pezullimi i tenderit 137 milionësh i KEK-ut dhe dyshimet për skemë korruptive
Tenderi për “Rehabilitimin dhe Modernizimin e Njësisë A3” në Termocentralin Kosova A, me vlerë 137,340,000 Euro, është pezulluar dje, vetëm një ditë para afatit përfundimtar për dorëzimin e ofertave. Ky tender ka ngritur dyshime të forta për muaj me radhë, është zhvilluar në mënyrë të dyshimtë.
Disa nga faktet:
– Mungesë transparence: Tenderi u hap pa studim fizibiliteti dhe pa përshkrim teknik, duke lënë të paqartë se çfarë punësh kërkohen nga operatori ekonomik.
– Procedura të manipuluara: Procesi u korrigjua dhe afatet u shtynë disa herë, duke krijuar hapësirë për dyshime.
– Tender i hapur me negociata: Në njoftim thuhej se KEK do të pranonte vetëm gjashtë ofertues dhe mandej do të negocionte se kujt të ja japë tenderin , për më tepër nuk ishin paraparë penalizime për mosrealizim të punimeve.
– Ndërkohë që po flasim për njësisë A3, që sipas vet KEK-ut kjo njësi prodhon rreth 10% të kërkesës së energjisë në Kosovë, duke e bërë tenderin jetik për sigurinë energjetike.
Pezullimi i papritur ngrit pyetje serioze:
1. Pse u pezullua në momentin e fundit, kur procesi duhej të përfundonte?
2. Po thuhet se dikush u ankua. Kush u ankua? Ku u ankua? Me çfarë procedure ankohesh dhe ku ankohesh një ditë para kalimit të afatit për dorëzimin e ofertave? Asnjë procedurë ankese nuk ishte paraparë në këtë kohë.
2. A po tentohet të fshihet ndonjë shkelje e mundshme ligjore?
3. A po i jepet kohë ndonjë kompanie të favorizuar për të rregulluar ofertën?
4. Pse u fshinë ofertat e dorëzuara nga sistemi dhe u kërkua ridorëzimi i tyre nga fillimi?
5. Pse nuk u anulua plotësisht tenderi, nëse ka kaq shumë parregullsi?
Ky pezullim nuk duket si veprim përgjegjës, por si një hap për të mbuluar një skemë të mundshme korruptive me vlerë 137 milionë euro. Pezullimi i sotëm duket si manovra e radhës për ta rikthyer nesër tenderin me të njëjtat probleme dhe përfitues të dyshimtë.
Tenderi duhet anuluar plotësisht dhe aktorët e përfshirë duhet të hetohen deri në fund.
E derisa kemi skema të tilla në veprim dhe të paprekura nga hetuesia qytetarët po paguajnë çmimin e lartë të importit të energjisë e fitimet e tragtarëve të energjisë po rritën në mënyrë eksponenciale.
