Kancelari gjerman Friedrich Merz ka zhvilluar një bisedë telefonike me presidentin e SHBA-së Donald Trump në lidhje me dërgesat e armëve në Ukrainë.
Sipas zëdhënësit Stefan Kornelius, së kancelarit Merz, të cilit i referohet Reuters, Merz bisedoi me Trump pas vendimit të administratës amerikane për të pezulluar një paketë ndihme ushtarake për Ukrainën.
Kornelius konfirmoi gjithashtu se Berlini po përpiqet të sigurojë nga SHBA dy sisteme Patriot për t’i dhënë Ukrainës, një marrëveshje për të cilën më herët kishte rënë dakord ish-presidenti Joe Biden.
Sipas agjencisë Bloomberg, qeveria gjermane ka shprehur gatishmërinë për të mbuluar tërësisht kostot e kësaj ndihme urgjente, që kapin shifrën e rreth 500 milionë eurove. Propozimi i Gjermanisë është dorëzuar para disa javësh tek Sekretari Amerikan i Mbrojtjes, Pete Hegseth.
Ndërkaq, po sot presidenti ukrainas Volodymyr Zelensky deklaroi sot se ai dhe Presidenti i SHBA-së Donald Trump ranë dakord të forconin mbrojtjen ajrore të Ukrainës.
Marrëveshja vjen mes shqetësimeve në rritje të Kievit pasi Uashingtoni tha se po ndalonte disa prej dërgesave të armëve kritike, duke ngritur frikën në lidhje me aftësinë e Ukrainës për të mbrojtur qiellin e saj mes sulmeve të vazhdueshme ruse.
“Sot diskutuam situatën aktuale, duke përfshirë sulmet ajrore ruse dhe zhvillimet më të gjera në vijën e frontit. Presidenti Trump është shumë i informuar dhe e falënderoj për vëmendjen e tij ndaj Ukrainës. Folëm për mundësitë në mbrojtjen ajrore dhe ramë dakord se do të punojmë së bashku për të forcuar mbrojtjen e qiellit tonë. Gjithashtu kemi rënë dakord për një takim midis ekipeve tona”, shkruan Zelensky në mediat sociale pasi foli në telefon me Trump.
Ai vuri në dukje se me presidentin Trump zhvilloi një bisedë të detajuar dhe se të dyja vendet janë të gatshme për projekte që kanë të bëjnë me sigurinë dhe veccanërisht për dronët dhe tekonologjinë në fushën e mbrojtjes kundrejt sulmeve ruse.
“Patëm një bisedë të detajuar rreth aftësive të industrisë së mbrojtjes dhe prodhimit të përbashkët. Jemi gati për projekte të drejtpërdrejta me Shtetet e Bashkuara dhe besojmë se kjo është jashtëzakonisht e rëndësishme për sigurinë, veçanërisht kur bëhet fjalë për dronët dhe teknologjitë përkatëse. Gjithashtu u ndalëm te prokurimi dhe investimet e ndërsjella. Së fundmi, shkëmbyem pikëpamje mbi situatën diplomatike dhe punën e përbashkët me SHBA-në dhe partnerë të tjerë”, shkruan më tej Zelensky.
