Ministri në detyrë i Punëve të Brendshme, Xhelal Sveçla, ka reaguar për kërcënimin me bombë në kuvendin e Kosovës, që sipas prokurorit Zejnullah Gashi ishte i rrejshëm.
Ai ka thënë se numri i telefonit i përket kompanisë telefonikë MTS dhe shfrytëzuesi i numrit ka qenë ose është shtetasi serb Lazar Živković.
Sipas Sveçlës në “disa profile të lidhura me këtë numër është gjetur fotografia e kriminelit të luftës Ratko Mladić”.
“Me datën 05.07.2025, një kërcënim për bombë është adresuar ndaj Kuvendit të Republikës së Kosovës. Institucionet relevante të sigurisë e kanë trajtuar me prioritet të lartë këtë sulm hibrid ndaj institucioneve të Kosovës, i cili është konfirmuar se ka origjinën në Serbi. Numri i telefonit nga i cili është bërë kërcënimi është i regjistruar në Serbi dhe i përket kompanisë telefonike MTS. Shfrytëzuesi i numrit ka qenë ose është shtetasi serb Lazar Živković. Në disa profile të lidhura me këtë numër është gjetur fotografia e kriminelit të luftës Ratko Mladić.”
Sveçla ka thënë se institucionet janë duke e trajtuar rastin me prioritet të lartë.
“Institucionet e Kosovës janë duke trajtuar rastin me prioritet të lartë dhe do të kërkojnë mbështetje ndërkombëtare për arrestimin dhe vënien para përgjegjësisë të personave që qëndrojnë pas kërcënimit, sa më shpejt që të jetë e mundur. Sulmuesit dhe kërcënuesit që strehohen në Serbi, pavarësisht mbështetjes nga shteti serb, nuk do të arrijnë t’i shmangen përgjegjësisë.”
