Në orët e para të mëngjesit të sotëm në Lipjan, një person ka ndërruar jetë pasi dyshohet se ishte duke sulmuar automjete dhe kalimtarë në gjendje të dehur.
Lidhur me rastin ka reaguar edhe Inspektoriati Policor i Kosovës duke thënë se në koordinim me Prokurorin e Shtetit do të hetojnë rastin në fjalë.
Në kuadër të autorizimeve ligjore, IPK do të vlerësoj dhe hetoj reagimin policor në këtë rast përderisa rasti do të trajtohet si “Hetim mbi vdekjen”.
Komunikata e plotë:
“IPK në koordinim me Prokurorin e Shtetit do të vlerësoj dhe hetoj reagimin policor në rastin e Lipjanit
Prishtinë/Lipjan, 07 korrik 2025
Inspektorati Policor i Kosovës është njoftuar sot në orët e hershme të mëngjesit nga Policia e Kosovës lidhur me një incident që kishte ndodhur pas mesnatës në rrugën “Haradin Bajrami” në Lipjan .
Zyrtarët e Policisë së Kosovës kishin reaguar në këtë incident pas pranimit të informacionit për një person të dyshuar në rrugën ‘Haradin Bajrami’ në Lipjan i cili më vonë ishte raportuar se ka vdekur.
Njësitet relevante hetimore policore si dhe prokurori kanë dalë në vendin e ngjarjes kurse trupi i pajetë i personit është dërguar në Institutin e Mjekësisë Ligjore për obduksion.
IPK në kuadër të autorizimeve ligjore, në koordinim me Prokurorin e Shtetit do të vlerësoj dhe hetoj reagimin policor në këtë rast përderisa rasti do të trajtohet si “Hetim mbi vdekjen”.
Hetuesit e IPK-së në koordinim të plotë me Prokurorin e Shtetit do të vazhdojnë të ndërmarrin edhe shumë veprime hetimore drejt ndriçimit të të gjitha rrethanave që ndërlidhen me këtë incident”
