Prej më shumë se dy dekadash, Burim Berisha drejton pa ndërprerje Komunën e Fushë Kosovës si përfaqësues i Lidhjes Demokratike të Kosovës. Gjatë gjithë kësaj kohe, ai ka përkujdesur që njerëz të afërt me të, kryesisht nga vendlindja e tij, Sllatina e Madhe, të sistemohen në pozitat më të rëndësishme të administratës komunale. Nën drejtimin e tij ‘të përjetshëm’, komuna po përballet me akuza të rënda për punësime me lidhje familjare dhe klientelizëm.
Shumica e drejtuesve kryesorë në administratë, nënkryetari Besnik Osmani, drejtori i Kadastrit Ilir Hasani, drejtori i Infrastrukturës Bardhyl Koicici dhe ish-drejtoresha e Shëndetësisë Mimoza Shala, vijnë nga Sllatina e Madhe, vendlindja e kryetarit.
Ndërkohë, qytetarë të tjerë nga Fushë Kosova, me mbi 40 mijë banorë, mbeten jashtë çdo përfaqësimi në pozita drejtuese.
Në muajin mars, Gazeta Insajderi raportoi ekskluzivisht se si kryetari “i përjetshëm” i Fushë Kosovës e rehatoi vëllai, e gruas së djalit, Donat Zharkun.
Zharku u emërua nga Berisha si drejtor i Inspeksionit, i njëjti po mbikëqyr projekte kapitale në komunë.
Lajmin për emërimin e tij e ka konfirmuar vet ai në prononcim për Insajderin.
Madje, Donat Zharku deklaronte se emërimi i tij në këtë pozitë nuk ka të bëjë me lidhjen familjare që ka me kryetarin e Fushë Kosovës.
“Pozita ime aktuale është rezultat i përvojës dhe angazhimit tim profesional ndër vite dhe në asnjë moment lidhjet familjare nuk kanë pasur ndikim në këtë proces. Po të ishte për shkak të lidhjeve familjare atëherë këtë pozite do ta merrja shumë më herët dhe jo tani”, shprehej ai.
Zharku dhe bashkëfshatarët e tij nuk janë të vetmit që ia panë hajrin Berishës.
Në Administratën e Komunës së Fushë Kosovës, Amir Bullatovci, mik i djalit të Berishës dhe ish-punonjës i ATK-së, është vendosur drejtor, ndërkohë që për emërimin e tij nuk ka asnjë informacion nëse është zhvilluar ndonjë procedurë transparente.
Mimoza Shala, e cila dha dorëheqje nga pozita e drejtoreshës së Shëndetësisë, vazhdon të jetë e pranishme në zyrat e komunës pa ndonjë sqarim publik për statusin apo rolin e saj aktual.
Gjithashtu, Parayll Zogiani, drejtor i Urbanizmit dhe djali i vëllait të një shoku të ngushtë të kryetarit, mban një nga pozitat më të rëndësishme në komunë, ndërsa lidhjet familjare ngrejnë dyshime për mënyrën e përzgjedhjes së tij.
Gazeta Insajderi ka kërkuar përgjigje nga Burim Berisha, Besnik Osmani dhe drejtuesit e përmendur, por deri në publikim, askush nuk ka dhënë asnjë sqarim.
Theksojmë se Komuna e Fushë Kosovës drejtohet nga Burim Berisha i Lidhjes Demokratike të Kosovës për pesë mandate me radhë. Me 12 tetor do të mbahen zgjedhjet lokale të radhës, por ende nuk është bërë e ditur nëse Berisha do të kandidojë përsëri në këtë garë.
