Presidentja Vjosa Osmani ka folur në një panel në Institutin Hudson gjatë vizitës së saj në SHBA për temën e paqes e stabilitetit në Europë dhe rolin e rëndësishëm të Amerikës në kontinent.
Duke u përgjigjur një pyetjeje rreth presidentit serb, Osmani përmendi rolin e tij në qeverinë e kriminelit të luftës, Sllobodan Millosheviq, si ministër i Propagandës, raporton Gazeta Express.
“Dua të them, të gjithë kemi kaluar nëpër luftë, ishim fëmijë të luftës, kemi kaluar nëpër një luftë të tmerrshme, por nuk kemi marrë pjesë, populli i Kosovës nuk ka marrë pjesë në kryerjen e krimeve. Ndërsa kur e sheh Vuçiqin, ai ishte ministri i propagandës së Millosheviqit. Dua të them, është e vërteta, është e vërteta. Ecën si rosë dhe flet si rosë, është…”, tha Osmani, duke përdorur një idiomë amerikane.
Osmani tha se Vuçiq ende beson në të njëjtën mendësi.
“Është për të ardhur keq. Është për të ardhur keq për popullin e Serbisë dhe vendin që ai drejton, është për të ardhur keq për të gjithë rajonin, dhe pastaj është për të ardhur keq për të gjithë aleatët tanë që ata duhet të merren me taktikat e tij të vazhdueshme të destabilizimit…Ai flet për Serbinë e madhe ose botën serbe. Është një kopje e librit të Putinit”, tha Osmani atje.
Kjo s’i pëlqeu Petar Petkoviqit, drejtor i të ashtuquajturës Zyre për Kosovën në qeverinë serbe, i cili reagoi në X me një gjuhë fyese ndaj Osmanit.
“Vjosa nuk e fsheh më sa e fiksuar është me Vuçiçin, kudo që shkon goja e saj është plot me Vuçiqin. Tani ajo ka shkuar një hap më tej dhe madje sheh edhe një rosë”, ka shkruar Petkoviq.
