Njohësi i zhvillimeve politike në vend, Burim Ramadani, ka folur për ngërçin institucional të krijuar në vend.
Ramadani në një prononcim dhënë për “Gazeta Blic” tha se nuk po sheh as vullnet dhe as synim për tejkalimin e kësaj krize politike.
Ai tha se kështu siç është situata Kosova hyn edhe në vitin 2026 pa institucione.
“Jo, nuk shoh as vullnet dhe as synim për tejkalimin e ngërçit. Përkundrazi, shoh vullnet e synim që ngërçi të tejkalojë edhe zgjedhjet lokale.Kështu sikur është, Kosova hyn edhe në vitin 2026 në pa institucione” tha Ramadani.
Ramadani tha se ‘qëllimet e Kurtit dhe VV-së mbeten te pushteti, jo te shteti’.
“Fatkeqësisht, qëllimet e Kurtit dhe VV-së mbeten te pushteti, jo te shteti. Pra, assesi nuk duan të konstituojnë Kuvendin anipse nuk i kanë votat për ta zgjedhur me diktat kandidaten e rrëzuar gati 10 herë.Dhimbja e VV-së nuk është Albulena, por Qeveria” deklaroi ai.
Ai tha se të njëjtit, LVV-ja, nuk duan as zgjedhje sepse e kanë të qartë se i humbin edhe rreth 10 ulëse.
“Po ashtu as zgjedhje nuk duan sepse e kanë të qartë që do të humbin edhe rreth 10 ulëse. Fatkeqësisht, këtë e kanë në dorë tash: ngërçin” tha Ramadani në përgjigjen e dhënë.
Dje ka dështuar për herë të 45-të të konstituohet Kuvendi i Kosovës.
Kryesuesi i seancës, Avni Dehari, vazhdon të insistojë në krijimin e komisionit për votim të fshehtë, komision i cili nuk po përkrahet nga asnjë prej partive ish-opozitare.
