Presidenti i Rusisë, Vladimir Putin, synon që t’i vazhdojë luftimet në Ukrainë derisa Perëndimi të angazhohet për paqe sipas kushteve të tij, duke qenë i pashqetësuar nga kërcënimet e homologut amerikan, Donald Trump, për sanksione më të ashpra, dhe kërkesat e tij territoriale mund të zgjerohen përderisa forcat ruse avancojnë, thanë tri burime të afërta me Kremlinin.
Putini, i cili dha urdhër për dërgimin e trupave ruse në Ukrainë në shkurtin e vitit 2022 pas tetë vitesh luftime në pjesën lindore të këtij shteti mes trupave ukrainase e separatistëve të përkrahur nga Moska, beson se ekonomia dhe ushtria ruse janë mjaftueshëm të forta për t’i bërë ballë çfarëdo mase shtesë nga Perëndimi, i thanë burimet agjencisë së lajmeve “Reuters”.
Trumpi të hënën shprehu zemërim me refuzimin e Putinit për t’u pajtuar për armëpushim dhe njoftoi një valë të re të dërgesave të armëve për Ukrainën, përfshirë sistemin e mbrojtjes ajrore “Patriot”. Ai gjithashtu kërcënoi me sanksione shtesë ndaj Moskës, nëse nuk arrihet një marrëveshje e paqes brenda 50 ditëve.
Tri burimet ruse, të afërta me mendimet e nivelit të lartë në Kremlin, thanë se Putini nuk do ta ndalë luftën nën presion nga Perëndimi dhe beson se Rusia – e cila u ka mbijetuar sanksioneve më të ashpra të vendosura nga Perëndimi – mund t’i bëjë ballë një vështirësie tjetër ekonomike, përfshirë taksat me të cilat ShBA-ja i ka kërcënuar blerësit e naftës ruse.
“Putini mendon se askush nuk është angazhuar me të seriozisht për hollësitë e paqes në Ukrainë – përfshirë amerikanët – prandaj ai do të vazhdojë derisa ta marrë atë që e do” – i tha agjencisë “Reuters” njëri nga burimet në kushte anonimiteti për shkak të ndjeshmërisë së situatës.
Pavarësisht disa telefonatave mes Trumpit e Putinit dhe vizitës në Rusi të emisarit të posaçëm amerikan, Steve Witkoff, presidenti rus beson se nuk ka pasur diskutime të hollësishme për themelin e një plani të paqes, tha më tej burimi.
“Putini e vlerëson marrëdhënien me Trumpin dhe pati diskutime të mira me Witkoff-in, por interesat e Rusisë janë mbi çdo gjë tjetër” – shtoi burimi që deshi të mbetej anonim.
Shtëpia e Bardhë nuk iu përgjigj një kërkese për koment për këtë artikull.
Sipas burimeve, në mesin e kushteve të Putinit për t’i dhënë fund luftës përfshihet një zotim ligjërisht i detyrueshëm se NATO-ja nuk do të zgjerohet drejt lindjes, neutraliteti i Ukrainës dhe kufizimet ndaj forcave të armatosura të saj, mbrojtja e rusishtfolësve që jetojnë në këtë shtet dhe pranimi i fitoreve territoriale të Rusisë.
Ai është gjithashtu i gatshëm për të diskutuar rreth një garancie të sigurisë për Ukrainën ku do të përfshiheshin fuqitë e mëdha, edhe pse nuk është e qartë se si do të funksiononte një gjë e tillë, thanë burimet.
Presidenti i Ukrainës, Volodymyr Zelensky, ka thënë se vendi i tij nuk do ta njohë kurrë sovranitetin e Rusisë mbi rajonet e pushtuara dhe se Kievi e mban të drejtën sovrane për të vendosur nëse dëshiron të anëtarësohet në NATO apo jo. Zyra e tij nuk iu përgjigj një kërkese për koment për këtë artikull.
Sidoqoftë, një burim tjetër i afërt me të menduarit në Kremlin tha se Putini i konsideron qëllimet e Moskës shumë më të rëndësishme se çfarëdo humbje të mundshme ekonomike nga presioni i Perëndimit dhe se ai nuk është i shqetësuar nga kërcënimet e Shteteve të Bashkuara për t’u vendosur taksa Kinës dhe Indisë për shkak të blerjes së naftës ruse.
Dy prej burimeve thanë se Rusia ka avantazh në fushën e betejës dhe ekonomia e saj, e drejtuar nga lufta, është duke e tejkaluar prodhimin e aleancës së NATO-s në municione kyçe, si predhat e artilerisë.
“Apetiti vjen me të ngrënë” – tha njëri nga burimet, që do të thotë se Putini mund të kërkojë më shumë territore, nëse lufta nuk ndalet. Dy burimet e tjera në mënyrë të pavarur e konfirmuan të njëjtën gjë.
