Pas gati dy dekadash uzurpim të pretenduar të një objekti që i takon pensionistëve të Ferizajt, biznesmeni ferizajas, Uron Salihu, pritet që nesër të dalë para Gjykatës Themelore në Ferizaj përballë një padie civile që ka ngritur Ministria e Financave.
Salihu, pronar i restorantit “Bodensee”, dyshohet se ka mbajtur në mënyrë të paligjshme katin përdhes të objektit të pensionistëve, duke e kthyer atë në biznesin e tij dhe duke u pamundësuar pensionistëve qasjen e lehtë në shërbimet e tyre.
Ky biznes figuron i regjistruar nga viti 2020 në Agjencinë për Regjistrimin e Bizneseve (ARBK).
Ministri në detyrë i Financave, Hekuran Murati, ka deklaruar se tashmë ndaj Salihut është ngritur edhe aktakuzë penale për uzurpim të paligjshëm të pronës, ndërsa në anën tjetër është kërkuar edhe një masë e përkohshme nga gjykata për lirimin e objektit dhe kompensimin e dëmit në vlerë prej 1.4 milionë euro.
“Tash e gati 20 vite, pensionistëve të rajonit të Ferizajt u është dashur të ngjiten në katin e dytë për të marrë shërbimet që u takojnë, sepse pjesa e katit të parë… ka qenë e uzurpuar paligjshëm nga një biznes,” ka shkruar Murati në Facebook.
Seanca për shqyrtimin e masës së përkohshme pritet të mbahet nesër, më 18 korrik, në ora 13:15 në Gjykatën Themelore në Ferizaj.
Gazeta Insajderi ka kontaktuar edhe me biznesmenin Uron Salihu, i cili ka refuzuar të flasë, duke kërkuar që të komunikohet përmes avokatit të tij, Gazmend Rexhepi.
Avokati Rexhepi ka mohuar se klienti i tij është uzurpator, duke theksuar se objekti është shfrytëzuar mbi bazë kontrate dhe se kontrata nuk është ndërprerë kurrë nga asnjë qeveri.
“Klienti im nuk është uzurpator, por shfrytëzues i asaj parcele me kontratë, e cila nuk është ndërprerë asnjëherë nga ministria. Dhe çështja tjetër, që është shumë e rëndësishme, është se edhe vetë ministria e shfrytëzon një pjesë të atij objekti që i përket klientit tim. Ai e ka në pronësi një bodrum brenda lokalit, dhe aty ministria e përdor pjesën e tij – për të cilën kanë pasur marrëveshje gojore,” tha avokati në një prononcim për Insajderin.” deklaroi Rexhepi.
Ai shtoi se nuk është e ligjshme që njëkohësisht të zhvillohen procedura penale dhe civile për të njëjtën çështje dhe e quajti të pasaktë qasjen e Ministrisë në këtë rast.
“Ministri e ka gabuar plotësisht, sepse nuk mund të zhvillohet një procedurë penale dhe njëkohësisht një procedurë civile. Në momentin kur kemi një procedurë penale në zhvillim, ajo civile duhet të ndërpritet. Çështja tjetër është se, sipas dispozitave ligjore në fuqi dhe praktikës gjyqësore, nuk mund të ketë brenda një parashtrese dy kërkesa – si për paluajtshmëri, ashtu edhe për masë sigurie” tha avokati për Insajderin.
