Nënkryetari i komunës dhe kandidati për kryetar të Mitrovicës, Arian Tahiri, ka marrë pjesë këtë javë në festën e organizuar nga organizata RINAS, e cila ka shënuar një sukses të jashtëzakonshëm në fushën e arsimit.
Sipas Tahirit, përmes trajnimeve të ofruara nga kjo organizatë, vetëm gjatë këtij viti janë pranuar 157 studentë në Fakultetin e Mjekësisë, një numër i konsiderueshëm prej të cilëve janë nga Mitrovica.
“Jam shumë i lumtur që kemi kontribuar në rrugëtimin e tyre, duke subvencionuar me prioritet aktivitetet e organizatës RINAS. Gjithmonë do t’i mbështesim të rinjtë tanë në idetë dhe projektet e tyre, sepse vetëm kështu do ta bëjmë Mitrovicën qendër të dijes, kulturës dhe sportit”, ka deklaruar Tahiri.
Ai shtoi se përmes projekteve në fushën e shëndetësisë, po ndërtohet jo vetëm e tashmja, por edhe e ardhmja e këtij sektori në Mitrovicë, me qëllim që qyteti të prodhojë mjekët më të mirë në vend.
