Policia dhe Prokuroria në Prizren kanë realizuar një operacion të përbashkët kundër fajdesë ditën e martë dhe nga kyy operacion, në pranga si të dyshuar kanë përfunduar Fadil Selimi, Beqir Selimi (vëllezër) dhe Arsim Dogani.
Gjykata Themelore në Prizren ka pranuar kërkesën e Prokurorisë për caktimin e masës së paraburgimit ndaj Fadil Selimit, Beqir Selimit dhe Arsim Doganit, të dyshuar për veprat penale “Fajdeja”, “Sulm ndaj personit zyrtar” dhe “Rrezikimi i trafikut publik”.
Gazeta Online Veriu.info ka siguruar kërkesën e Prokurorisë Themelore të Prizrenit drejtuar Gjykatës për caktimin e masës së paraburgimit për tre të pandehurit.
Sipas dosjes së prokurorisë ngjarja kishte nisur në vitin 2019, kur viktima, pasi kishte mësuar se të dyshuarit jepnin të holla me kamatë, ishte takuar fillimisht me Beqir Selimin dhe më pas me Arsim Doganin. Nga ata kishte marrë shuma të ndryshme parash (5,000, 10,000 dhe 15,000 euro).
Mirëpo, nga ai moment, fitimet që i dëmtuari i realizonte shkonin pothuajse të gjitha për pagesën e kamatave vjetore.
Për shumat e marra viktima u detyrua të paguaj kamatë në shumë prej 10,000.00 euro, 60,000.00 euro (të cilën kamatë vjetore e ka paguar në vitin 2024 kur ka qenë i detyruar për të shitur shtëpinë e tij ne shume prej 60,000.00 euro), 20,000.00 euro dhe deri më tani i kanë mbetur për ti paguar shumën prej 36,500.00 euro, në emër te kamatës vjetore, të cilat kamata vjetore i ka paguar gjatë sezonit të verës pasi i njëjti punon si muzikant, ashtu që gjithë fitimin që ka realizuar gjatë sezonit të dasmave ka paguar ne emër te kamatave për të hollat që i ka marrë nga të njëjtit si më lartë.
Sipas Prokurorisë më 18 gusht, të dyshuarit Beqir Selimi dhe Arsim Dogani u zunë në flagrancë teksa po pranonin shumën prej 10,000 eurove nga viktima, para këto që ishin dhënë në emër të kamatës. Vetëm katër ditë më parë, më 14 gusht, të dyshuarit i kishin shkuar viktimës në shtëpi duke i marrë edhe një mijë euro të tjera.
Sipas dosjes së prokurorisë, të dyshuarit posedojnë të kaluar të pasur kriminale, ku Beqir Selimi ka të regjistruara 10 raste për lëndim trupor, kanosje, vrasje e mashtrim, ndërsa Fadil Selimi ka gjithsej 24 raste në databazën e Policisë për vepra të ndryshme penale./Veriu.info/
