Nga 17 deri më 26 korrik të vitit 1998, forcat e regjimit serb kryen një nga masakrat më të rënda në Rahovec, ku sipas dëshmive u vranë dhe u ekzekutuan rreth 100 civilë, përfshirë gra, fëmijë dhe pleq. Shumica e tyre ishin të strehuar në teqenë e Sheh Myhedinit dhe në zonat përreth qytetit.
Në 26-vjetorin e kësaj ngjarjeje të dhimbshme, Presidentja e Kosovës, Vjosa Osmani, ka përkujtuar Epopenë e Rahovecit, duke u përulur me nderim para kujtimit të dëshmorëve të Ushtrisë Çlirimtare të Kosovës dhe martirëve të kësaj ngjarjeje.
Ajo tha se Rahoveci mbetet një plagë dhe dhimbje e thellë për Kosovën, por edhe një kujtesë që vazhdon të frymëzojë betejën për drejtësi.
“Rahoveci është plagë, dhimbje, por edhe kujtesë që na frymëzon ta çojmë përpara betejën për drejtësi. Kujtimi për viktimat është i përjetshëm, teksa zëri ynë për drejtësi nuk do të pushojë kurrë, derisa ajo të ngadhënjejë”, shkroi Osmani.
