Pas dështimit të konstituimit të Kuvendit për herë 49-të, sot sytë dhe veshët janë drejtuar nga takimi i kryetarit të VV-së, Albin Kurti dhe kryetarit të Nismës, Fatmir LImaj. Ndonëse palët nuk kanë treguar kohen e mbajtjes së takimit, ai pritet të ndodhë në orët e pas ditës në Prishtinë. Takimi do të tregojë se kush nga këta të dy do të lëshojë pe.
Zyrtarët e këtyre dy partive janë shprehur optimist për takimit.
Megjithatë, ata nuk kanë dhënë ndonjë shenjë se mund të heqin dorë nga qëndrimet e tyre.
Deputetja e Nismës, Xhevahire Izmaku, ka treguar se Nisma vazhdon të mbrojë qëndrimin e saj për çështjen e kryeparlamentarit.
Ajo ka thënë se Nisma bën marrëveshje me VV-në vetëm nëse pranon që Fatmir Limaj të jetë kryetar i Kuvendit.
“Presim që sot të zhvillohet takim, pres një sinjal pozitiv nga ky takim që besoj se do të ndodhë sot. Pres sinjal pozitiv dhe vullnet politik nga lideri i VV-së. Ky është realiteti politik, Nisma e ka zgjat doren e bashkëpunimit. Presim nga lideri i VV-së të shihet se ka vullnet. Të largohemi nga ky ngërrç, kjo mundësi ekziston”, ka thënë ajo, duke shtuar se Limaj kryeparlamentar është oferta më e mirë për vendin.
“Nisma e ka ofru këtë bashkëpunim, kjo është dashtë me u materialize me një marrëveshje politike. Nuk ka ofertë tjetër, kemi ofru bashkëpunim pa kushte. Kushte që ekzekutivin ta ketë partia e parë, ndërsa në krye të Kuvendit të jetë Limaj. Nuk është kusht, është mundësi, më e mira që i ofrohet vendit në këtë moment. Limaj do t’i merrte votat. Është mundësia me dalë nga ky ngërç”, ka thënë Izmaku.
Edhe nga VV-ja kanë bërë me dije se ka vullnet të mirë për marrëveshje në këtë takim.
Deputeti i kësaj partie, Artan Abrashi, ka thënë se VV-ja është e gatshme për marrëveshje edhe me subjektet tjera politike.
“Takimet me përfaqësuesit e partive politike dhe grupeve parlamentare, VV-ja është duke i bërë vazhdimisht. Jo sot, por edhe dje, edhe pardje, edhe nesër. Me Limajn sigurisht, por edhe të tjerë që shprehin vullnet dhe gatishmëri”, është shprehur Abrashi.
Kurse, deputetët e partive tjera janë shprehur pësimit se ky takim do të mund të sjell diçka të re.
Ata kanë bërë me dije se Kurti nuk do të lëshon pe për postin e kryetarit të Kuvendit.
Deputeti i PDK-së, Elmi Reçica, ka thënë se nuk beson që mund të ketë ndonjë marrëveshje nga ky takim.
“Pak besoj që do të ketë marrëveshje duke e njohur Albin Kurtin, jam skeptik. Ai ka kogja problem me dhënë kryetarin e Kuvendit”, ka thënë Reçica.
Të njëjtin mendim ka edhe deputetja e komunitetit boshnjak, Duda Balje.
Ajo ka vlerësuar se nuk pret ndryshime në pozicionimin e deritanishëm të Lëvizjes Vetëvendosje në raport me postin e kryeparlamentarit.
“E personalisht, mendimi im është që nuk ka me ndryshuar Albulena. Edhe nuk besoj që do të shkojë te votimi i hapur”, është shprehur ajo.
Nëse këto dy subjekte politike pajtohen, atëherë VV-ja(48), komunitet jo serbe(8), Nenad Rashiqi dhe Nisma(3) do t`i kenë 60 vota.
Për konstituimin e Kuvendit do të ju duhet edhe një votë. Deri me tani askush prej VV-së nuk ka treguar se kush mund të jetë vota e 61-të për konstituimin e Kuvendit.
