Pas gjashtë muajsh ngërç në Kuvend, Limaj e Kurti janë takuar për koalicionin e mundshëm dhe kanë qenë të butë ndaj njëri-tjetrit me deklarata, mirëpo jo edhe më parë.
Albin Kurti dhe Fatmir Limaj rrallë kanë ndarë të njëjtin vizion politik dhe edhe më rrallë të njëjtin fjalor për njëri-tjetrin. Për vite me radhë, marrëdhënia e tyre ka qenë e mbushur me kritika të ndërsjella, akuza politike dhe qëndrime diametralisht të kundërta për çështjet më të rëndësishme të shtetit të Kosovës.
Kurti e ka parë Limajn si përfaqësues të një politike të vjetër e të korruptuar, ndërsa Limaj e ka akuzuar Kurtin për autoritarizëm, mungesë përvoje dhe dështim në qeverisje. Por gjithçka ndryshoi pas zgjedhjeve të shkurtit 2025.
Në muajin korrik, pas gjashtë muajsh ngërç në Kuvend, Limaj e Kurti janë takuar për koalicionin e mundshëm dhe kanë qenë të butë ndaj njëri-tjetrit me deklarata, mirëpo jo edhe më parë.
Limaj e kishte krahasuar Kurtin me presidentin e Serbisë, Aleksandar Vuçiq, duke e cilësuar si autoritar. Dhe në vitin 2019, Limaj kishte thënë se Vetëvendosja do t’i kallte institucionet nëse nuk do të kalonte pragun siç nuk e kaloi Nisma për pak vota.
“Albin Kurti po dëshiron pushtet absolut sikurse kryetari serb, Aleksandar Vuçiq. Sipas Limaj pushteti absolut, do të sillte degjenerim total në shtetin e Kosovës, njësoj sikurse pushteti në Serbi. Nuk besoj kurrë në Kosovë që do ta lejonte t’i hipte atij rreziku për të lejuar një parti politike të jetë e vetëmjaftueshme për të qeverisur”, kishte thënë Limaj.
Ndërkaq kishte thënë se Kurti është veteran i rrejshëm, ani pse e ka certifikatën e veteranit të UÇK-së.
“Kurti thotë se nuk jam ushtar i UÇK-së. Fatkeqësisht ka certifikatë të veteranit të UÇK-së. Po, e ka certifikatën, por është veteran i rrejshëm. Ne e njohim veprimtarinë e Kurtit, ai ka qenë përkthyes i Adem Demaçit”, kishte thënë Limaj para tetë muajve në emisionin “Paradoks” me gazetarin Vehbi Kajtazi.
“Pas Rambujesë e ka pasur mundësinë që të rreshtohet brenda radhëve të UÇK-së sepse Kurti ka udhëtuar në zonat e luftës. Kam pasur takim me të. Tri herë ka qenë te ne, hera e fundit ka qenë pas marrëveshjes së Rambujesë. Si ka qenë ushtar, hajt tregom si ka qenë ushtar i UÇK-së? Si është veteran i UÇK-së? Gjema një uniformë të Kurtit që është vesh?”, kishte pyetur Limaj gjatë këtij emisioni.
Dy vjet më parë, Limaj po merrte pjesë në një protestë të veteranëve të Luftës, kur kishte deklaruar se pushteti i Kurtit për dy vjet qeverisje kishte shkatërruar 20 vjet punë të shtetit të Kosovës.
“Këta njerëz jo që nuk bëjnë asnjë përpjekje për të sqaruar opinionin, për të kërkuar falje, për të bashkuar opinionin, por përkundrazi këta kanë filluar e kanë ndarë këtë shoqëri, e kanë copëtuar, me një fjalë parulla e tyre që ‘ata e kanë shkatërruar vendin për 20 vjet’, ju jeni dëshmitarë duke u shkatërruar të arriturat 20-vjeçare për dy vjet. Ja shkatërruesit e vendit, lirisë, demokracisë, shtetit, e gjithë çfarë është arritur në këto 20 vjet, këta për dy vjet janë duke e shkatërruar”, tha Limaj.
As Vetëvendosje nuk ia ka lënë keq me akuza dhe kritika ndaj Limajt. Partia e Kurtit vazhdimisht e ka lidhur Limajn me korrupsionin deri në ardhjen në pushtet të kësaj partie.
Një prej deklaratave më të rënda ishte ajo e Avni Zogianit kur e lidhi Limajn me dështimin e tij politik, luksin e jetën e errët.
“Ai ishte një patriot, patriotizmi i të cilit u zëvendësua nga praktika tipike lindore të politikanëve. Luks, afera, jetë e errët me një fjalë”, kishte thenë Zogiani.
“Kam vënë re se Limaj është eksponenti opozitar mbase më i helmuari me urrejtje kundër Kryeministrit dhe VV-së. Gjuha e tij kap ekstremet më të skajshme të urrejtjes, e pardje kapi një nga këto amplituda kur tha, ta heqim këtë helm! Shumë komentues e definojnë këtë thjesht si një frustrim që vie nga “pamundësia për të vjedhur””, kishte thenë ai.
