Ia ofroi votat, s’i mori. Tash ia kërkon votat, s’ia jep.
Një ying-yang i llojit të vet ka ngjarë mes Albin Kurtit dhe Fatmir Limajt tash e tre muaj. Një rreth i vogël në gjysmen e një tërësie që assesi s’po rrumbullakësohet del të jetë shndërruar çështja e tre votave të Nismës Socialdemokrate që supozohet t’ia ndërtojë mazhorancën e thjeshtë Vetëvendosjes.
Limaj, me t’u konkluduar zgjedhjet parlamentare, doli nga rigjiditeti kampor mes Vetëvendosjes dhe ish-opozitës ku bënte pjesë dhe me tiketën e të cilëve mori tre ulëse. Por, e ridimensionoi veten.
Partive ish-opozitare, Limaj ua çoi porosinë: ose bëni marrëveshje politike mes vete deri më 15 prill – seanca e parë konstitutive – ose vetë ai detyrohet të kthejë horizont nga Vetëvendosja. Ish-opozita s’lëvizi, lëvizi Limaj.
Në takimin e parë me Albin Kurtin në Zyrë të Kryeministrit Limaj i ofroi pa-një-pa-dy votat e tij: pa asgjë në këmbim, sipas tij, veçse vendi të ketë parlament dhe institucione.
Në “Rubikon” te Adriatik Kelmendi, Limaj ndau qëndrimet se si iu paraqit Albin Kurtit dhe çka (nuk) u zhvillua:
“Çka doni nga unë? A po i doni numrat? Nëse i doni numrat s’kemi nevojë me e çu ma gjatë temën. Merri numrat e mi, unë ta votoj qeverinë e pakicës dhe shkoj rri në opozitë”, tha Fatimr Limaj.
Kështu, sipas Limajt, ai e luajti ‘altruistin’ politik. Por, Kurti deshti tjetër gjë: dhe jo veç votat e tij bllanko. Partneritet.
Kelmendi: Pse me aq kollaj me ia dhanë votat?
Limaj: Se nuk du kryeministri i jem me u ni në siklet. Adriatik, unë nuk e shantazhoj kryeministrim tem. Nuk e bëj kurrë. Qe ku i ke tre numra. Nëse je mbet në tri vota të mia. Unë dal në parlament e shpjegoj pse po t’i jap votat. Po i do votat, t’i jap unë rri në opozitë. Zoti Kurti më ka thanë ‘Jo, unë dua partneritet’. Dhe, aty unë i kam thanë këtë temë pra më mbylle, se nuk i kthehna mo kësaj. Po don partneritet? Si na sheh partner? Foli për partneritet në qeverisje. Në bisedë i ndërhyva. Mos u lodh se s’jam i interesum për qeverisje. E vlerësojmë, por s’jam i interesum. Ai u habit.
Krejt kjo më para seancës së parë konstitutive dhe gjatë saj: “gjentellmenisht”, tha Limaj, Kurti ia pranoi që t’ia jep kryeparlamentarin. Por, për shkak se s’i kishte votat, ai pa që Albulena Haxhiu ishte bërë nominantja.
Tash e më shumë se tre muaj, tre votat e Limajt janë bërë arrë e fortë për t’u thyer nga Albin Kurti, kur qysh në fillim, i kishte, sipas Limajt, me ‘altruizëm’. Takimi i fundit mes tyre, siç kuptoi Nacionale, nuk prodhoi rezultat dhe përfundoi shkurt. Por, për t’u takuar sërish.
Kanë mbetur gjashtë ditë dhe veç tri seanca kur përfundon sahati kushtetues për konstituimin e Kuvendit të Kosovës, dhe kjo legjislaturë mund të merr fund pakthyeshëm.
Mbetet të shihet a do të jetë Limaj arra që e then veten këtë javë për të mos shkuar në zgjedhje të reja./Nacionale
