Presidentja e Komisionit Evropian, Ursula von der Leyen, ka deklaruar se Bashkimi Evropian do ta ketë “shumë të vështirë të ruajë nivelin aktual të hapjes së tregut” me Kinën nëse kjo e fundit vazhdon të mbajë një suficit të madh tregtar ndaj BE-së, për të cilin ajo fajësoi “shtrembërime tregtare”, përfshirë subvencionet shtetërore të Pekinit.
Sipas The Guardian, von der Leyen ka theksuar se BE-ja për momentin përbën 14.5% të totalit të eksporteve kineze, ndërsa Kina përfaqëson vetëm 8% të eksporteve të BE-së.
“Këto shifra tregojnë shkallën e marrëdhënies sonë, por gjithashtu zbulojnë një pabarazi në rritje. Kjo vjen kryesisht si rezultat i shtrembërimeve të shumta tregtare dhe pengesave për akses në treg. Ndryshe nga tregjet e tjera të mëdha, Evropa vazhdon ta mbajë të hapur tregun e saj ndaj mallrave kineze. Kjo pasqyron përkushtimin tonë të kahershëm ndaj tregtisë së bazuar në rregulla. Megjithatë, kjo hapje nuk po shpërblehet nga Kina. Bilanci tregtar i Bashkimit Evropian me Kinën është dyfishuar në dekadën e fundit, duke arritur tani mbi 300 miliardë euro,” është shprehur Presidentja e KE-së.
