Para pak ditësh, banorëve të lagjes ‘Dardania’ në Gjilan u ka ardhur një letër nga Qeveria – konkretisht nga Ministria e Brendshme dhe Ministria e Pushtetit Lokal ku thuhet se zyrtarisht nuk janë më banorë të Gjilanit, por të Komunës së Novobërdës, shkruan Gazeta Metro.
Kjo nënkupton se për çdo shërbim publik, si dokumentet personale e pronësore, regjistrimin e fëmijëve në shkolla, përfshirjen në lista zgjedhore dhe çdo lidhje tjetër me pushtetin lokal, ata tash e tutje do t’u drejtohen institucioneve të Novobërdës.
Qeveria Kurti e arsyeton këtë veprim si pjesë e implementimit të decentralizimit, por në esencë ky proces ka përfunduar moti.
Ky veprim shihet si një taktikë e pastër politike për të shkëputur një territor me banorë etnik shqiptarë dhe për të ia shtuar atë Komunës së Novobërdës me pak banorë dhe shumicë serbe.
Me këtë rast të njëjtin vend, Vetëvendosje synon ta fitojë në zgjedhjet lokale, përmes kandidatësh që vijnë pikërisht nga lagjja që po shkëputet.
E tmerruar nga ky vendim, Shadie Shkodra, një banore e lagjes ‘Dardania’, ka reaguar ashpër duke thënë se ky është një veprim i papranueshëm që cenon të drejtat e qytetarëve për interesa të pushtetit.
Ajo thotë se kjo lagje po ndahet për qëllime puro politike dhe po ua vështirëson jetën gjilanasve për qëllime partiake e të pushtetit lokal.
“Me qëllime puro politike në prag të zgjedhjeve lokale në Kosovë po shkëputet lagja jonë. Po na hiqet e drejta për të qenë banorë të Gjilanit për të realizuar një qëllim politik. Kjo është e papranueshme dhe ne si banorë nuk do të ndalemi deri në realizimin e plotë të kërkesës sonë. Nuk do të lejojmë ministrin Xhelal Sveçla, por as Ministrinë e Pushtetit Lokal të Elbert Krasniqit, që në kurriz të banorëve të realizojnë qëllime politike, duke synuar të fitojnë një kandidat nga kjo lagje për kryetar të Novobërdës”, ka thënë ajo për Metro.
Shkodra paralajmëron se do të ketë protesta dhe se vendimi nuk do të pranohet, pasi, sipas saj, po u çrregullon jetën e përditshme – nga dokumentet, te shkollat e deri te vendet e punës.
“Do të ketë protesta dhe nuk do ta prabojmë këtë vendim që na e çrregulloj jetën, dokumentet, shkollat dhe vendet e punës. Kjo është inxhiniering politik i paparë deri tash dhe nuk tolerohet më. Decrntralizimi ka përfubduar moti, dhe Pavarësia është fituar para 17 vjete. Çka është kjo lojë me qytetarë të Gjilanit sot? Sjemi kukulla që për një fitore në komunë ti bartim shtëpuat tona në një komunë tjetër, vetëm se i konvenon Albon Kurtit”, ka thënë për Metro, Shadie Shkodra nga lagja Dardania”
