Rozeta Hajdari e ka kundërshtuar si të paligjshëm hetimin penal të Prokurorisë Speciale për rastin e Rezervave Shtetërore.
Ministrja në detyrë e Tregtisë, e cila të enjten është intervistuar për herë të dytë në cilësinë e të dyshuarës për këtë rast në Prokurorinë Speciale, është ankuar se Prokuroria Speciale ka marrë dokumente sekrete pa leje të AKI-së.
“Për këtë proces jetik tani pyetem nga Prokuroria Speciale, por një pyetje vjen se a është ky proces i ligjshëm dhe si prokuroria hyri në ministri për të marrë dokumente të klasifikuara si sekret të rezervave shtetërore”, tha Hajdari në një deklaratë për media të enjten pasi doli nga intervistimi në Prokurorinë Speciale.
Sipas saj, asnjë person nuk mund të ketë qasje në dokumente të klasifikuara si sekret pa lejen e Agjencisë së Kosovës për Inteligjencë (AKI).
“Asnjë person nuk mund të ketë qasje në rezervën klasifikuar sekret pa një procedurë të qartë ligjore sipas udhëzime të AKI-së dhe Agjencisë për mbrojtje të klasifikuara”, tha ajo.
Por, ministrja Hajdari harroi që i kishte krijuar Ridvan Muharremit akces në dokumentet e Rezervave Shtetërore të klasifikuara si sekret shtetëror.
Muharremi, një afarist i afërt me pushtetin, është një nga të dyshuarit për aferën. Ai ishte angazhuar si ndërmjetësues mes Ministrisë së Tregtisë dhe dy kompanive, turke e polake, në procesin e blerjes së rezervave shtetërore.
Në kundërshtim me Ligjin për Klasifikimin e Informacioneve dhe Verifikimin e Sigurisë, sekseri Muharremi dhe asnjë nga zyrtarët e komisionit të caktuar për negocimin e kontratave me kompanitë, kishin krijuar qasje në dokumentet sekrete pa marrë certifikatë të sigurisë nga AKI-ja.
Një hulumtim i Paparacit, i botuar vitin e kaluar, zbuloi sesi ministrja Hajdari i kishte marrë vetë përsipër negociatat me kompanitë private për mbushjen e rezervave shtetërore. Dosja e rastit, të cilën e publikoi Paparaci, dëshmon për komunikime direkte me e-maile të Hajdarit me sekserin Ridvan Muharremi.
“I nderuari zotëri Ridvan”, i drejtohej me e-mail ministrja Hajdari, afaristit Muharremi, në një prej komunikimeve të cilat i publikoi Paparaci për këtë rast. “Jemi në urgjencë të gjetjes së rezervës për vaj gjersa kemi manipulime të çmimeve në treg”.
