Organizata e Veteranëve të Luftës ka finalizuar përgatitjet për protestën e nesërme.
Gazmend Syla ka bërë të ditur se në protestë pritet të flasin Nevenka Tromp, profesoreshë e studiuese ndërkombëtare, Ali Ahmeti e të tjerë.
“Janë bërë të gjitha përgatitjet, kemi kërkuar leje nga komuna e Prishtinës, është njoftuar Policia e Kosovës. Është angazhuar edhe ambulanca. Kemi komunikuar me struktura tona, shumë qytetarë, i është dhënë mundësia që me ardh me autobus, kemi komunikuar me parkingun Prishtina që me i prit autobusët. Bina, zërimi të gjitha janë përfunduar. Ka mbetur vetëm nesër me fillu protesta, po iu njoftojmë se folës do të jenë Nevenka Tromp, profesoreshë universitare, organizatori, Hysni Gucati, kryetari i OVL-UÇK-së, një bashkëluftëtar i yni, lideri i shqiptarëve në Maqedoni, Ali Ahmeti, dhe një djal dëshmori”, tha ai.
Syla la të hapur mundësinë edhe për protesta tjera në të ardhmen.
“Organizata e Veteranëve të Luftës ka pasur fushatë diplomatike, iu kemi shkruar institucioneve ndërkombëtare, shumë figurave me peshë ndërkombëtare, meqenëse pothuajse është konsumuar ajo kohë, tash kemi filluar me këtë protestë, do të vlerësojmë e vendosim se a do të ketë edhe protesta të tjera, sigurisht që do të kemi, do të jemi në mbështetje të bashkëluftëtarëve tonë”, tha ai.
“Kategoritë e dala nga lufta e kanë pranuar me shqetësim pranimin e provave nga Serbia, bëhet fjalë për tri organe që kanë kryer krime e gjenocid mbi popullin tonë, është e papranueshme që bashkësia ndërkombëtare, Gjykata Speciale, me i pranu ato prova, sepse ata po i legjitimojnë këto institucione, sepse tre krerët e këtyre institucioneve janë dënuar. Është e papranueshme, është motiv shtesë me dalë në protestë dhe protesta të tjera që do të kemi”, theksoi më tutje.
OVL komentoi edhe deklaratat e djeshme të presidentes Osmani.
“Nuk i kemi kërkuar dikujt me dalë, partive a dikujt, kanë shprehur vullnet vet, i falënderojmë të gjithë, edhe partitë, edhe plot njerëz të tjerë që në forma të ndryshme kanë shprehur gatishmërinë. Qëndrimi i Presidencës shumë pak na intereson, Presidentja nuk e ka luajtur asnjëherë rolin e vet as ndaj Gjykatës Speciale as ndaj kategorive të dala nga lufta. Tepër i parëndësishëm çka ka thënë presidentja, për neve është e rëndësishme me marrë pjesë edhe qytetarët, fëmijën me veti, sa më shumë të ketë fëmijë e familjarë, mesazhi do të jetë më i qëndrueshëm”, tha Syla.
