Bekim Salihu nga Instituti GAP, në një intervistë në EURO n’T7, ka thënë se Qeveria e vendit këtë vit ka vendosur të jetë strikte në grantin për arsim, duke financuar numrin e mësimdhënësve bazuar në numrin e nxënësve dhe jo në listën e pagave, të cilat i paraqesin komunat, sikur ka ndodhur deri më tash.
Sipas hulumtimit të Institutit GAP, deri në vitin 2026 Ministria e Financave e ka marrë si të mirëqenë listën e pagave që e ka paraqitur komuna, ndërkohë që, duke filluar nga ky vit, as Ministria e Arsimit e as ajo e Financave nuk e marrin të mirëqenë listën që e dërgojnë komunat.
Salihu thotë se kjo çështje ishte rregulluar me një udhëzim administrativ, 22/13, qysh në vitin 2013, pra që numri i mësuesve të jetë kompatibil me numrin e nxënësve, por tani, 13 vjet më vonë, Qeveria ka vendosur ta zbatojë atë.
Sipas kësaj rregulloreje, një mësimdhënës duhet t’i mbulojë 21 nxënës në komuna të mëdha, ndërsa në komuna të vogla një mësimdhënës duhet t’i mbulojë 17 nxënës.
“Nisur nga kjo formulë e vitit 2013, është bërë vlerësimi në vitin 2026 dhe ka dalë që aktualisht komunat mbajnë në punë 3,101 mësues më shumë sesa janë nevojat reale. Duhet pasur parasysh që Kosova, nga viti 2010 e tutje, është përcjellë me një rënie drastike të numrit të nxënësve. Aktualisht, nga viti 2010 e deri më sot, numri i nxënësve ka rënë për 160 mijë, ndërkohë që vetëm nga viti 2020 deri në 2026 numri i nxënësve ka rënë për 30 mijë. Edhe përkundër kësaj, në bazë të hulumtimit tonë, edhe pse ka rënë numri i nxënësve në komuna, është rritur numri i mësimdhënësve ose edhe numri i stafit”, ka thënë Salihu.
