Deputetja e PDK-së, Ganimete Musliu, e ka kritikuar ashpër kryeministrin në detyrë, Albin Kurti.
Ajo ka bërë me dije se kryetari i VV-së prej 24 vitesh punon kundër shtetit të Kosovës.
Në profilin e saj në “Facebook”, ajo ka shkruar se Kurti aktivitete kundër Kosovës i ka nisur menjëherë pas daljes nga burgu.
“24 vjet kundër Kosovës. Për të luftuar me kaq këmbëngulje kundër shtetit tënd për më shumë se dy dekada, duhet të jesh deri në palcë i mbushur me urrejtje dhe çmenduri. Që nga dita kur ka dalë nga burgu, Albin Kurti e ka kanalizuar energjinë e tiij, jo për forcimin e shtetësisë, por për minimin sistematik të saj. Në vend që të angazhohet për shtetin që pretendon se e don, ka zgjedhur ta sfidojë, ta delegjitimojë dhe në fund ta nënshtrojë. E gjithë kjo jo për ideal, por për kontroll. Kosova nuk ka nevojë për një njeri që e sheh shtetin si një pronë personale, e demokracinë si një bezdi që pengon agjendat e tij”, ka shkruar ajo, duke shtuat se Kosova nuk ka nevojë për një person që nuk duron debat.
“Kosova është më shumë se një miting. Më shumë se një parullë. Më shumë se një fjalim patetik. Kosova nuk mund të mbetet peng i një njeriu që për mbi dy dekada nuk ka ditur tjetër veçse të përdor çdo mjet për të mohuar dhe për të bastarduar çdo të arritur dhe çdo gjë që e kemi të shenjtë. Kosova nuk mund të mbetet peng i një përçarësi ekstremist që nuk njeh as komb as Zot. Tani është koha për t’u indinjuar dhe për t’u ballafaquar. Heshtja nuk është më opsion. Për Liri e Demokraci! Kundër Diktaturës!”, ka shkruar Musliu.
