Deputeti shqiptar në Kuvendin e Serbisë, Shaip Kamberi, ka paralajmëruar se policia multietnike në Luginën e Preshevës dhe Sanxhak po rrezikon të zhduket, për shkak të mungesës së përfaqësimit të drejtë të shqiptarëve dhe boshnjakëve në strukturat policore.
Përmes një postimi në rrjetet sociale, Kamberi ka bërë të ditur se bashkë me deputetët e Partisë së Veprimit Demokratik (SDA) nga Sanxhaku, Ahmedin Shkrijel dhe Minela Kalender, kanë iniciuar hartimin e një programi të veçantë për punësimin e të rinjve shqiptarë dhe boshnjakë në polici.
Sipas tij, punësimet e dekadës së fundit nuk kanë garantuar përfaqësim të barabartë, çka ka sjellë “zvogëlim të ndjeshëm të numrit të shqiptarëve dhe boshnjakëve në polici” dhe mospërputhje serioze mes përbërjes së saj dhe strukturës kombëtare të popullsisë lokale.
“Prandaj, në iniciativën që i kemi dërguar Kryeministrit të Serbisë kemi kërkuar që të inicohet program i veçantë për punësimin e të rinjve shqiptarë dhe boshnjakë, si parakusht për ekzistimin e policisë multietnike. Ky program duhet të vazhdojë derisa përbërja e policisë të pasqyrojë realisht përbërjen kombëtare të popullsisë në Luginën e Preshevës dhe Sanxhak”, ka theksuar Kamberi.
Ai ka kujtuar se në vitin 2001, me ndërmjetësimin e OSBE-së, u krijua një model i suksesshëm i policisë multietnike, i cili, sipas tij, solli stabilitet dhe besim te qytetarët. “Sot është koha të rikthejmë dhe forcojmë këtë model. Një program i tillë do të përmirësonte sigurinë dhe do të pasqyronte në mënyrë të drejtë strukturën e popullësisë në këto komuna dhe qytete”, ka shtuar deputeti shqiptar.
Postimi i plotë:
Policia multietnike po rrezikon të zhduket – kërkojmë program të veçantë për punësimin e të rinjve shqiptarë dhe boshnjakë në polici!
Bashkë me deputetët e SDA nga Sanxhaku, Ahmedin Shkrijel dhe Minela Kalender, kemi inicuar hartimin e një programi të veçantë për punësimin e të rinjve shqiptarë dhe boshnjakë në strukturat policore në të gjitha komunat dhe qytetet ku jetojnë shqiptarët dhe boshnjakët.
Punësimet e deritanishme, sidomos ato të 10 vjeçarit të fundit, nuk kanë garantuar përfaqësim të drejtë dhe kjo ka zvogluar dukshëm numrin e shqiptarëve dhe boshnjakëve në polici dhe ka sjellë mospërputhje serioze në strukturën e policisë lokale, duke cenuar besimin dhe ndjenjën e sigurisë tek qytetarët.
Prandaj në iniciativën që i kemi dërguar Kryeministrit të Serbisë kemi kërkuar që të inicohet Program i veçantë për punësimin e të rinjëve shqiptarë dhe boshnjakë si parakusht për ekzistimin e policisë multietnike.
Programi i lartëpërmendur të vazhdojë derisa përbërja e policisë të pasqyrojë realisht përbërjen kombëtare të popullsisë në Luginën e Preshevës dhe Sanxhak.
Në vitin 2001, me ndërmjetësimin e OSBE-së, u krijua një model i suksesshëm i policisë multietnike që solli stabilitet dhe besim. Sot, është koha të rikthejmë dhe forcojmë këtë model!
Një program i tillë do të përmirësonte sigurinë dhe do të pasqyronte në mënyrë të drejtë strukturën e popullësisë në këto komuna dhe qytete.
