Ish partitë opozitare e kanë mirëpritur vendimin e Gjykatës Kushtetuese lidhur me seancën konstituive, ndërsa Lëvizja Vetëvendosje e ka kundërshtuar.
Lidhur me atë se a do të zbatohet ky vendimi nga VV-ja, kryeministri në detyrë, Albin Kurti, sot tha se pret aktgjykimin e plotë, pasi ai i 8 gushtit ishte vetëm një njoftim për vendimin.
Hulumtuesi i lartë nga KDI, Vullnet Bugaqku, për Gazeta Blic ka sqaruar se si janë procedurat për caktim të seancës konstituive.
“Seanca konstituive e Kuvendit të Kosovës pritet të caktohet pasi Gjykata Kushtetuese ta publikojë aktgjykimin e plotë në Gazetën Zyrtare të Kosovës. Deri tani Gjykata ka shpallur vetëm një njoftim, në të cilin ka publikuar dispozitivin e vendimit të saj, megjithatë nuk është shpallur ende aktgjykimi i plotë i cili duhet ta ketë edhe arsyetimin në tërë të secilës pikë, në kuadër të këtij dispozitivi të këtij vendimi. Andaj, seanca mund të thirret pas publikimit të aktgjykimit të plotë dhe nga ai moment fillon fuqia juridike e atij vendimi dhe fillon afati që kryesuesi brenda 48 orëve nga dita e publikimit duhet ta thërras seancën, ku duhet të votohet me votim të hapur, siç e ka cekur gjykata dhe duhet të propozohet kandidati nga Lëvizja Vetëvendosje”, ka thënë ai.
Bugaqku ka theksuar se e gjitha duhet të përfundojë brenda 30 ditësh dhe kandidati duhet të propozohet 3 herë.
“Krejt procedura sipas vendimit të Gjykatës duhet të përfundojë brenda 30 ditësh dhe rrjedhimisht deputetët kanë obligim edhe kushtetues që ta zbatojnë këtë vendim dhe ta konstituojnë kuvendit në bazë të afatit kushtetues. Po ashtu, gjykata ka theksuar se një kandidat mund të propozohet 3 herë dhe nëse nuk i merr votat, atëherë duhet të ndërrohet kandidati dhe kjo të zgjasë jo më shumë se 30 ditë”, ka potencuar ai.
Ai shton se “nëse deputetët brenda 30 ditëve nuk konstituojnë Kuvendin siç ka kërkuar Gjykata, ajo nuk i ka sqaruar pasojat e mundshme”.
Por, çka ndodh nëse brenda këtij afati nuk konstituohet Kuvendi?
Për këtë, sipas Bugaqkut janë dy mundësi.
“Rrjedhimisht ka dy mundësi që mund të krijohen, me skadimin e këtij afati. E para, Gjykata Kushtetuese përsëri mund të lëshojë një vendim dhe mund të konstatojë se meqenëse asnjë prej 48 deputetëve të grupit më të madh parlamentar nuk i morën votat e mjaftueshme për kryetar kuvendi, atëherë kjo e drejtë e propozimit i kalohet ndonjë grupi tjetër parlamentar. Dhe situata e dytë mund të jetë që pas 30 ditëve nëse nuk konstituohet Kuvendi, Gjykata mund të japë urdhër që të shpallen zgjedhjet e reja parlamentare”, ka deklaruar Vullnet Bugaqku nga KDI.
