I dyshuari kryesor për rastin e vrasjes së trefishtë në Gjilan, më 10.08.2025, Mefail Shkodra, rreth 6 vite më parë, në 2019, ishte dënuar për posedim të armës pa leje.
Më 18.01. 2019, Mefail Shkodra ishte dënuar nga Gjykata në Gjilan me 500 euro dënim me gjobë duke ia mundësuar pagesën me dy këste.
Për këtë rast, Gjykata i kishte shqiptuar Mefail Shkodrës edhe dënim plotësues duke ia konfiskuar një revole të llojit Gesichert, një karikator si dhe 20 fishekë të kalibrit 9mm si dhe një sprej “sabre red”.
“…. i shqiptohet DËNIMI PLOTËSUES duke ju konfiskuar edhe ate: një revole të llojit Gesichert me numër serik 7575, një karrikator si dhe 20 fishekë të kalibrit 9mm si dhe një sprej “ sabre red “ të cilat pas plotëfuqishmërisë së këtij aktgjykimi duhet të shkatërrohen përmes komisionit kompetent të cilin duhet ta formoj kryetari i kësaj gjykate,..”-thuhet në vendim Gjykatës së Gjilanit, të datës 18.01.2019..
Mefail Shkodra për këtë çështje penale ishte shpallur fajtor sepse akuzohej se më datë 14.02.2018, në fshatin Velekincë, Komuna e Gjilanit, në mënyrë të paautorizuar ka siguruar dhe mbajtur në pronësi armën e zjarrtë, ashtu që gjatë kontrollimit të shtëpisë së tij nga ana e pjesëtarëve të Policisë së Kosovës, i është gjetur një armë e zjarrtë – revole e tipit Gesichert, një karikator, 20 fishekë të kalibrit 9mm dhe një sprej “sabre red”.
Në aktgjykimin e përpiluar disa ditë më pas, me datë 23.01.2019 thuhet se Mefail Shkodra për këtë çështje penale kishte arritur marrëveshje për pranimin e fajësisë.
Gjykata pas vlerësimit të marrëveshjes mbi pranimin e fajësisë si dhe të deklaratave të palëve kishte vërtetuar se janë plotësuar kushtet ligjore për të vendosur që dënimin e rekomanduar ta aprovoj.
“….Andaj edhe kishte vendosur që rekomandimin e arritur mes palëve lidhur me dënimin me gjobë sipas marrëveshjes ta aprovoj, me shpresë se edhe me një dënim të tillë mund të arrihet qëllimi i plotë dënimit duke e rehabilituar dhe parandaluar edhe të pandehurin edhe qytetarët potencial që në të ardhmen mos të kryejnë vepra të tilla apo të ngjashme penale.” – thuhet në vendimin e Gjykatës së Gjilanit.
Në arsyetimin e këtij aktgjykimi thuhet se palët kanë hequr dorë nga e drejta në ankesë andaj dhe ky aktgjykim me datë 18.01.2019 ishte bërë i plotfuqishëm.
Kjo lëndë ishte trajtuar në Gjykatën e Gjilanit- Departamenti i Krimeve të Rënda, dhe ishte gjykuar nga gjyqtari Aziz Shaqiri.
Mefail Shkodra bashkë me dy djemtë e tij, Edonis dhe Engjull Shkodra janë të dyshuarit për vrasjen e trefishtë, që ka ndodhur më 10.08.2025 në Gjilan.
Tre të dyshuarit ende ndodhen në arrati dhe Policia e Kosovës po vazhdon kërkimin e tyre.
Mefail Shkodra, i dyshuari kryesor për vrasjen e trefishtë në Gjilan më 10.08.2025, pak kohë më parë ishte liruar nga masa e paraburgimit pas kërkesës për dorëzani nga Prokuroria Speciale për një rast të fajdesë.
Për Shkodrën, Prokuroria Speciale kishte bërë kërkesë që t`i aprovohej dorëzania në vlerë prej 50 mijë euro në mënyrë që t`i hiqej masa e paraburgimit.
Kurse për të birin e Mefail Shkodrës, Edonis Shkodra, ishte propozuar nga po e njëjta prokurori dorëzania në vlerë prej 20 mijë euro në mënyrë që t`i ndërpritej masa e paraburgimit.
Gjykata kishte aprovuar këtë kërkesë të Prokurorisë Speciale, por kishte obliguar të dyshuarit që të lënë në hipotekë edhe një njësi kadastrale ku janë të ndërtuara dy objekte në vlerë prej 354,000.00 euro.
Për vrasjen e trefishtë që ndodhi me datë 10.08.2025, disa persona ditën e premte me 15.08.2025 disa persona ishin mbledhur për të protestuar para Gjykatës dhe Prokurorisë në Gjilan. /Kallxo
