Me publikimin e plotë të aktgjykimit nga Gjykata Kushtetuese lidhur me bllokadën në Kuvend përmes të cilit u dhanë rregulla të reja për konstituimin e Kuvendit, deputetët e Kuvendit të Kosovës proceduralisht mund të mblidheshin menjëherë.
Por, pasi kjo nuk ndodhi, Eugen Cakolli i KDI-së, thotë se me shumë gjasë arsyeja është se një pjesë e deputetëve janë ende në pushime për shkak se s’ka arsye ligjore pse vazhdimi i seancës konstituive të Kuvendit nuk u thirr menjëherë.
“Mos keni dilema! Nuk ekziston asnjë arsye ligjore, procedurale apo përgatitore pse vazhdimi i seancës konstituive të Kuvendit nuk u thirr menjëherë pas publikimit të aktgjykimit të Gjykatës Kushtetuese. Thjesht, një pjesë e deputetëve, me gjasë, janë ende në pushime”.
Cakolli ka kritikuar ata duke thënë se humbja e dy ditëve të para tregon se rehatia e tyre politike është më e rëndësishme se themelimi i institucioneve të reja.
“Çdo ditë që kalon kot është ditë më pak për zgjidhjen e bllokadës. Dhe kur problemi është mungesa e vullnetit politik, humbja e dy ditëve të para tregon qartë se rehatia politike mbetet më prioritare sesa funksionaliteti institucional”.
Pas publikimit të aktgjykimit në Gazetën Zyrtare dje dhe me përfundimin e masës për pezullim të përkohshëm të Kuvendit nga gjykata, deputetët duhet të mblidhen brenda 48 orëve për të vazhduar me seancën konstituive.
