Propozimet e Lëvizjes Vetëvendosje për kryetar të Kuvendit të Kosovës nuk kanë kaluar as pas tentimit të 55-të për konsituimin e Kuvendit.
Në seancën e sotme, Vetëvendosje propozoi dy kandidate, Albulena Haxhiun dhe Donika Gërvallën. Por, asnjëra nga to nuk mori votat e mjaftueshme.
Haxhiu e Gërvalla morën nga 57 vota për dhe 56 kundër, ndërkaq tre deputetët e NISMA-s abstenuan.
Mirëpo, nga votimi i sotshëm u vërejt një ndryshim. Nga 56 vota “për” sa kishte zakonisht Lëvizja Vetëvendosje, sot VV-ja mori një votë më shumë.
Deputeti nga Partia Liberale Egjiptiane, Veton Berisha, ndryshoi qëndrimin e tij.
Berisha vendosi që këtë radhë të votojë “për” Albulena Haxhiun si dhe për Donika Gërvallën.
Ani pse më 17 maj kishte deklaruar se do të vazhdojë të votojë kundër Albulena Haxhiut si kryetare të Kuvendit, Berisha ka ndryshuar qëndrimin e tij.
Megjithatë, vota e Berishës ishte e pamjaftueshme për kalimin e propozimit të VV-së.
Seanca e radhës është caktuar pas 48 orëve, ndërkaq krerët e ish-partive opozitare janë deklaruar se do të vazhdojnë të votojnë kundër në rast se propozohen ish-anëtarë të Qeverisë Kurti.
Sipas aktgjykimit të fundit të Gjykatës Kushtetuese deputetët kanë afat prej 30 ditëve për konstituimin e Kuvendit.
