Për një moment, të vetëm dhe të parë në jetën e saj parlamentare, Shqipe Selimi zgodhi të mos jetë ‘kog’ i maçinerisë uniforme të votimit të partisë Vetëvendosje kur përpara ia vunë Donika Gërvallën që ta votojë për Kryetare të Kuvendit. Selimi nuk çoi dorë lartë; nuk votoi si partia. Arsyeja: dinjiteti i bashkëshortit të saj, Rexhep Selimi. Donika Gërvalla ka një rezyme të dendur ‘demonizimi’ të Rexhep Selimit për ‘njeri të botës së krimit’ ndaj të cilit ka pështyrë mllef të llahtarshëm – por, edhe ndaj Vetëvendosjes si të tillë, parti e cila e kishte emëruar Shef të Grupit Parlamentar në “Qeverinë Kurti I”. E mu këto qëndrime të Gërvallës, Shqipe Selimit dolën t’i kenë qenë gdhendur në kujtesë, graviteti emocional i të cilave ia rëndoi dorën poshtë.
Rexhep Selimi, një figurë kanonike e Vetëvendosjes kaherë – por tash e pesë vjet në paraburgim në Hagë në Dhomat e Specializuara – sot nuk doli të rëndojë edhe aq shumë në ndërgjegje të Vetëvendosjes: të cilët, edhe as s’i dolën në mbështetje Shqipe Selimi, qoftë edhe me një ‘llajk’ në postimin e saj në Facebook ku u sqarua se pse nuk e votoi Gërvallën. I vetmi që i doli – nëse mund të themi se i doli – në mbështetje me një “llajk” në Facebook ishte Gëzim Sveçla i degës së VV-së në Prishtinë. Tjetër: asnjë.
“Në përgjigje të interesimit të madh të mediave dhe opinionit publik lidhur me arsyen se pse nuk mora pjesë në votim gjatë seancës së sotme, dëshiroj të sqaroj se mospjesëmarrja ime nuk lidhet me motive partiake. Ajo ka të bëjë me një postim të datës 7 shkurt dhe 25 mars 2020, të cilin po e bashkëngjis në këtë shkrim. Këtë shpjegim po e bëjë për hir të transparencës dhe respektit ndaj opinionit, mediave dhe në veçanti, përkrahësve e votuesve të Lëvizjes Vetëvendosje. I falënderoj për mirëkuptimin kolegët, aktivistët dhe votuesit e Lëvizjes”, shkroi ajo.
Por, profile militantësh në ‘Facebook’ vërshuan me komente me kualifikime prej më të rëndave: deri te ‘në linjë me Listën Serbe’ siç edhe para-kualifikuan VV – ish/opozitën, kur ende s’ishte bërë e ditur që edhe Shqipe Selimi nuk kishte votuar pro Donika Gërvallës.
Vetëvendosja në anën tjetër votimin kundër Donika Gërvallës provoi ta përdredhojë për kinse rreshtim me Listën Serbe kundër bijës së heroit Jusuf Gërvallës, duke i dhënë tone anti-patriotike mbarë ish-opozitës – ndonëse dihet që Gërvala është figurë skajshmërisht përçarëse që s’gëzon mbështetje ndërpartiake as nuk është konsensuale.
Partia Demokratike e Kosovës i ofron votë Vetëvendosjes për Kryetar Kuvendi për të gjithë deputetët e saj që në mandatin e kaluar nuk kanë qenë pjesë e qeverisë – ndërsa edhe AAK ka dhënë tri emra që për ta janë të pranueshëm për kryetar kuvendi: Shqipe Selimin, Saranda Bogujevcin dhe Glauk Konjufcën.
