Ministri i Jashtëm rus, Sergei Lavrov ka thënë të enjten se presidenti rus, Vladimir Putin është i përgatitur të takohet me presidentin ukrainas, Volodymyr Zelensky, por ka shtuar se ekziston një pikëpyetje në lidhje me autoritetin e Zelenskyt për të nënshkruar një marrëveshje paqeje.
Putini dhe presidenti i SHBA-së, Donald Trump, janë takuar të premten në Alaska për samitin e parë Rusi-SHBA në më shumë se katër vjet, dhe të dy udhëheqësit diskutuan se si t’i japin fund luftës më vdekjeprurëse në Evropë që nga Lufta e Dytë Botërore, raporton Reuters.
Pas bisedimeve në Alaska, Trumpi ka thënë të hënën se kishte filluar të organizonte një takim midis udhëheqësve rusë dhe ukrainas, i cili do të pasohej nga një samit trepalësh me presidentin e SHBA-së.
Mirëpo, i pyetur nga gazetarët nëse Putini është i gatshëm të takohet me Zelenskyn, Lavrov ka thënë se “presidenti ynë ka thënë vazhdimisht se është gati të takohet, përfshirë edhe me z. Zelensky”.
“Me mirëkuptimin se të gjitha çështjet që kërkojnë shqyrtim në nivelin më të lartë do të përpunohen mirë dhe ekspertët dhe ministrat do të përgatisin rekomandimet e duhura. Dhe, sigurisht, me mirëkuptimin se kur të vijë puna për nënshkrimin e marrëveshjeve të ardhshme, çështja e legjitimitetit të personit që nënshkruan këto marrëveshje nga pala ukrainase do të zgjidhet”, ka shtuar Lavrov.
Putini ka ngritur vazhdimisht dyshime në lidhje me legjitimitetin e Zelenskyt, pasi mandati i tij në detyrë do të duhej të skadonte në maj 2024, por për shkak të luftës nuk janë mbajtur zgjedhje të reja presidenciale. Kievi thotë se Zelensky mbetet presidenti legjitim.
Zyrtarët rusë thonë se janë të shqetësuar se nëse Zelensky nënshkruan marrëveshjen e paqes, atëherë një udhëheqës i ardhshëm i Ukrainës mund ta kundërshtojë atë në bazë të faktit se mandati i Zelenskyt teknikisht kishte skaduar.
Ndërkohë, Zelensky ka thënë këtë javë se Kievi do të donte një “reagim të fortë” nga Uashingtoni nëse Putini nuk do të ishte i gatshëm të ulej për një takim dypalësh me të.
