Moscertifikimi i Listës Serbe për pjesëmarrje në zgjedhjet lokale të tetorit nga KQZ-ja ka nxitur reagime të shumta në vend dhe më gjerë.
Ky veprim i KQZ-së është dënuar nga aleatët e Kosovës, duke thënë se kjo është një përpjekje për të përjashtuar komunitetet nga zgjedhjet e 12 tetorit.
Derisa pushteti e ka vlerësuar si të drejt vendimin e KQZ-së, partitë opozitare kanë thënë se kjo është një lojë politike e VV-së.
Deri me tani për këtë çështje nuk ka folur vetëm presidentja e Kosovës, Vjosa Osmani.
Ndonëse kanë kaluar dy ditë që kur KQZ-ja e ka marrë këtë vendim, Osmani nuk e ka thënë asnjë fjalë për këtë çështje.
Ndryshe nga presidentja aleatët perëndimorë të Kosovës nuk kanë hedhur.
Përmes një komunikate për media, shtetet e QUINT dhe Bashkimi Evropian kanë shprehur shqetësimin e tyre për këtë vendim.
“Ambasadat e Francës, Gjermanisë, Italisë, Mbretërisë së Bashkuar dhe Shteteve të Bashkuara, së bashku me Zyrën e BE-së në Kosovë, shprehin shqetësimin e tyre në lidhje me përpjekjet e aktorëve politikë për të kufizuar konkurrencën midis partive politike që përfaqësojnë komunitetet jo-shumicë përpara zgjedhjeve të ardhshme lokale më 12 tetor”, është thënë reagimit.
Ata kanë vlerësuar se çdo përpjekje për të përjashtuar komunitetet nga zgjedhjet, minon parimet demokratike.
“Çdo akt i tillë për të përjashtuar komunitete të caktuara minon parimet demokratike dhe gërryen besimin në institucionet e Kosovës. Ne presim që qeveria në largim dhe të gjitha partitë politike të përmbahen nga hapat e mëtejshëm që mund të pengojnë regjistrimin e partive. Të gjitha procedurat duhet të kryhen në përputhje të rreptë me rregullat dhe mandatin e Komisionit Qendror të Zgjedhjeve. Në të njëjtën kohë, ne i inkurajojmë palët e prekura të shfrytëzojnë plotësisht Panelin e Ankesave dhe Parashtresave Zgjedhore për të kërkuar dëmshpërblim”, thuhet në reagim.
Të enjten KQZ-j ka marrë vendim për që të mos e certifikojë Listën Serbe.
Me 2 vota për, 2 kundër dhe 7 abstenime, KQZ-ja nuk e ka certifikuar Listën Serbe.
Një ditë më pas, Lista Serbe ka njoftuar se vendimin e KQZ-së e ka dërguar në PZAP.
Pas një lajmi të tillë, deputetët e VV-së kanë venë në shënjestër gjyqtarët e PZAP-së, të cilët do të vendosin për ankesën Listës Serbe.
Disa prej deputetëve të partisë së Albin Kurtit kanë filluar presionin ndaj këtyre gjyqtarëve, duke i publikuar emrat e tyre. Ndonëse një veprim i tillë po shihet si i dënueshëm, ata nuk janë ndalur.
Në profilet e tyre në rrjetet sociale deputetët e partisë së Albin Kurtit kanë kërkuar nga gjyqtarët e këtij paneli që të mos e certifikojnë Listën Serbe.
Këto veprime të deputetëve të VV-së janë dënuar nga shoqëria civile dhe Këshilli Gjyqësor i Kosovës, duke vlerësuar se kjo është një tendencë për të ndikuar në punën e drejtësisë.
Presidentja Vjosa Osmani nuk ka reaguar as ndaj kësaj fushate kundër gjyqtarëve të PZAP-së.
