Dyfishimi i tarifave nga Presidenti i ShBA-së, Donald Trump, për importet nga India deri në 50% hyri në fuqi sipas planit, të mërkurën, duke i shkaktuar një goditje serioze marrëdhënieve mes dy vendeve që u bënë partnerë strategjikë pas fillimit të këtij shekulli, shkruan Reuters.
Një tarifë ndëshkuese prej 25% e vendosur për shkak të blerjeve të naftës ruse nga India i shtohet tarifës së mëparshme prej 25% mbi shumë importe nga ky vend i Azisë Jugore dhe pritet të dëmtojë rritjen ekonomike të ekonomisë më të madhe dhe me rritjen më të shpejtë në botë.
Një burim i qeverisë indiane tha se Nju Delhi shpreson që SHBA-ja të rishqyrtojë tarifën shtesë prej 25%, duke shtuar se qeveria planifikon hapa për të ndihmuar në zbutjen e ndikimit të saj.
Vetoja e presidentit polak kundër ndihmave për refugjatët ukrainas shkakton stuhi politike
Trump e ngre mundësinë e një “lufte ekonomike”, nëse Rusia nuk lëviz drejt paqes
Lëvizja e SHBA-së e çon nivelin e përgjithshëm të detyrimeve deri në 50% për mallra si veshje, gurë të çmuar dhe bizhuteri, këpucë, artikuj sportivë, mobilie dhe kimikate – ndër më të lartat e vendosura ndonjëherë nga SHBA dhe në të njëjtin nivel me Brazilin.
Tarifat e reja gjithashtu rrezikojnë mijëra eksportues të vegjël dhe vende pune, përfshirë edhe në shtetin e kryeministrit Narendra Modi, Gujarat.
