Tensionet mes Shteteve të Bashkuara të Amerikës dhe Venezuelës janë rritur ndjeshëm pas grumbullimit të madh të forcave detare amerikane në Karaibet jugore, në një operacion që, sipas zyrtarëve amerikanë, ka për qëllim luftimin e kartelet e drogës në Amerikën Latine.
Presidenti amerikan, Donald Trump, e ka bërë luftën kundër karteleve një ndër prioritetet e administratës së tij, duke e lidhur atë me përpjekjet për kontroll të kufirit jugor dhe ndalimin e migracionit të paligjshëm.
“Shumë vende të Karaibeve dhe rajonit e kanë mirëpritur operacionin dhe përpjekjet e administratës për luftën kundër drogës,” tha për gazetarët zëdhënësja e Shtëpisë së Bardhë, Karoline Leavitt.
Ndërkohë, presidenti venezuelian Nicolas Maduro ka dënuar ashpër këtë dislokim ushtarak, duke e cilësuar si kërcënim të drejtpërdrejtë ndaj sovranitetit të vendit të tij.
“Diplomacia jonë nuk është diplomaci kërcënimesh dhe anijesh luftarake, sepse bota nuk mund të jetë si para 100 vjetësh,” deklaroi Maduro, qeveria e të cilit dërgoi së fundmi 15 mijë ushtarë në kufirin perëndimor me Kolumbinë, për të luftuar grupet e trafikut të drogës.
Një zyrtar amerikan, në kushte anonimiteti, ka deklaruar se aktualisht në rajon ndodhen ose pritet të mbërrijnë shtatë anije luftarake amerikane dhe një nëndetëse bërthamore me shpejtësi të lartë, duke e bërë këtë ndër dislokimet më të mëdha të kohëve të fundit në rajon. Në mesin e anijeve janë: USS San Antonio, USS Iwo Jima dhe USS Fort Lauderdale, të cilat bartin rreth 4500 trupa, përfshirë 2200 marinsa.
Sipas zyrtarëve të Pentagonit, janë aktivizuar edhe avionë zbulimi P-8, që operojnë në ujëra ndërkombëtare për mbledhje të të dhënave të inteligjencës.
Ndërkohë, Venezuela i ka dërguar një ankesë zyrtare Sekretarit të Përgjithshëm të OKB-së, Antonio Guterres, duke akuzuar SHBA-të për shkelje të Kartës Themeluese të OKB-së.
“Ky është një operacion masiv propagandistik, që synon të justifikojë atë që ekspertët e quajnë veprim ‘kinetik’ – që do të thotë ndërhyrje ushtarake në një vend sovran dhe të pavarur që nuk përbën kërcënim për askënd,” tha për gazetarët ambasadori i Venezuelës në OKB, Samuel Moncada, pas takimit me Guterresin.
Shtëpia e Bardhë ka konfirmuar qëndrimin e saj të ashpër:
“Trump është i gatshëm të përdorë çdo element të fuqisë amerikane për të ndalur përmbytjen e vendit tonë me drogë”, thuhet në deklaratën e së enjtes nga Shtëpia e Bardhë.
Në shkurt, administrata Trump shpalli kartelin Sinaloa dhe grupe të tjera kriminale si “Tren de Aragua” organizata terroriste globale, në përpjekje për të justifikuar zgjerimin e operacioneve ushtarake.
Ndërkohë, Maduro ka bërë thirrje për trajnimin e grupeve të mbrojtjes civile çdo të premte dhe të shtunë, në përgatitje të mundshme për “mbrojtje kombëtare”.
