Përfaqësuesja e Lartë e BE-së për çështjet e jashtme dhe politikën e sigurisë, Kaja Kallas, dënoi valën e sulmeve të rënda ajrore mbi Kievin, të cilat vranë më shumë se dhjetë persona, përfshirë fëmijë, dhe bëri thirrje për sanksione më të mëdha kundër Moskës.
“Këto sulme tregojnë se Putini po tallet me çdo lloj përpjekjeje për paqe që po bëhet”, tha Kallas përpara një takimi dy-ditor të ministrave të mbrojtjes dhe të jashtëm evropianë në Kopenhagë.
“Ajo që duhet të bëjmë është të rrisim presionin mbi Rusinë”, shtoi ajo, duke theksuar se sanksionet e reja mbi eksportet e energjisë dhe shërbimet financiare do ta “dëmtonin atë më shumë”.
Përveç masave ndëshkuese kundër Rusisë, Kallas u bëri thirrje gjithashtu anëtarëve të BE-së që të vazhdojnë furnizimin e Kievit me armë. “Ukraina ka nevojë për të gjithë mbështetjen ushtarake që mundet tani”, tha ajo.
Ministrat e mbledhur në kryeqytetin danez do të diskutojnë gjithashtu garancitë e sigurisë për Ukrainën pas përfundimit të luftimeve.
Bashkimi Evropian mund ta mbështesë Kievin duke vazhduar trajnimin e ushtrisë ukrainase dhe duke forcuar industrinë mbrojtëse të vendit, me angazhime nga shtetet anëtare individuale, tha diplomatja e lartë e Bashkimit Evropian.
Lufta nuk po mbaron “nëse shikoni se çfarë po bën Putini”, tha Kallas.
