Deputetja e LDK-së, Doarsa Kica-Xhelili ka komentuar situatën në Kuvend dhe me insistimin që Nenad Rashiq të zgjedhet nënkryetar.
Ajo ka thënë se Kushtetutën nuk do ta shkelte jo vetëm për një serb të zgjedhur të Albin Kurtit, por as për shqiptarin më të ndershëm në Kosovë.
“Kushtetuta e Republikës së Kosovës e shpalli Kosovën SHTET TË PAVARUR. Jo vetëm që nuk do ta shkelja për një serb të zgjedhur të Kurtit, por nuk do ta shkelja as për shqiptarin më të ndershëm mbi këtë vend – ndonëse një shqiptar i tillë s’do ta kërkonte kurrë këtë “kompromis””, ka shkruar Kica-Xhelili.
“E VV-ja e Kurtit duhet t’u përgjigjet qytetarëve të Kosovës pse e urren patologjikisht këtë Kushtetutë dhe Republikën bashkë me të”, ka thënë ajo.
Ajo ka pyetur se pse e shkeli mbi 10 herë në qeverisje; pse e shkeli mbi 50 herë me insistimin për komision të fshehtë; pse po e shkel sot për një serb që më shumë e pa të arsyeshme t’a mbronte Kushtetutën e Serbisë teksa e shkel të Kosovës; dhe pse po insiston ta shkelë prapë duke u mbledhur për votim të qeverisë pa konstituim – vetëm për t’a bllokuar shtetin.
“Veçse, gënjeshtrat e llojit “për ta hequr Listën Serbe nga kryesia” mos të na shesin, sepse e vetmja forcë që dobëson ata është respektimi i shtetit që ata nuk e njohin, dhe zhbllokimi i gjithë Republikës për një pozitë edhe ashtu pa ndonjë funksion madhor”, ka thënë ajo.
Deputetja e LDK-së thotë se duke e trajtuar Kushtetutën si paçavër nuk e dobëson Serbinë, por Kosovën.
“Sidoqoftë, meqë deklaruan se duan të votojnë qeverinë pa konstituim të plotë të Kuvendit, jam kurioze t’i shoh se si mblidhen 61 deputetë – meqë edhe ashtu na thonin se i kanë numrat”, ka thënë ajo.
“E pastaj ta shohim qeverinë e cilit shtet po e votojnë dhe me cilën Kushtetutë, meqë e Republikës së Kosovës nuk po u pëlqen”, tha në fund deputetja.
