“Jo, jo, jo. Pse me dhënë dorëheqje? A kjo po iu dhemb a çka?”, ka thënë Faruk Mujka, Kryeshef Ekzekutiv i Bordit të Ndërmarrjes Hidroekonomike “Ibër-Lepenci”, kur është pyetur nëse do të japë dorëheqje nga kjo pozitë pas ngritjes së aktakuzës nga Prokuroria Speciale.
Mujka, i cili është edhe anëtar i Lëvizjes Vetëvendosje, akuzohet për veprat penale të “Keqpërdorimit të pozitës zyrtare” dhe “Mosraportimit ose raportimit të rremë të pasurisë, të ardhurave, dhuratave, dobisë materiale ose detyrimeve financiare”, lidhur me kohën kur ai ka shërbyer si nënkryetar i komunës së Mitrovicës.
Në një prononcim për VOX Kosova ai ka thënë se nuk po ndjehet aspak i shqetësuar, pasi që konsideron se po ngriten aktakuza “anë e mbanë”, e të cilat ai pretendon se janë të pabaza.
“Po ndjehem njëjtë se s’ka send prej asaj pune. Po edhe ju, edhe shokët e juaj, këtë politikisht po këqyrni me shfrytëzu, po tybe s’ka send prej asaj pune”, ka deklaruar Mujka në një prononcim për VOX Kosova.
Ai thotë se në qoftë se funksionon drejtësia “unë aspak s’jam i shqetësuar hiç”. “Për besë ju jeni këtu po më duket po jetoni, po e shihni që po ngriten aktakuza anë e mbanë edhe mandej po bien poshtë sepse janë njëpërdorimshme, një përdorim”, shtoi.
“Sot u bë e lehtë me ngrit aktakuzë, pse mos po jep përgjegjësi najkush që po ngrit aktakuza të pabaza a? Prej kafeve të çajave po ngritin aktakuza. Por, po ia lëmë gjyqësisë këtë punë”, theksoi ai.
Organi i akuzës bëri të ditur se Mujka së bashku me H. M., ish-këshilltar i Faton Pecit, dyshohen se i kanë shkaktuar Agjencisë Kosovare të Privatizimit (AKP) dëm mbi 125 mijë euro.
