Sot Ambasada e SHBA-së në Kosovë ka njoftuar opinionin publik se është pezulluar dialogu strategjik me Kosovën, për shkak të veprimeve të Qeverisë së Kosovës. Ky veprim ka nxitur reagime të shumta.
Ndër reaguesit ka qenë edhe Bedri Hamza, i cili ka theksuar se aleanca me SHBA-në është më e rëndësishmja dhe se partneriteti me të nuk duhet të rrezikohet, transmeton Veriu.info.
Kryetari i Mitrovicës, përmes një postimi në Facebook, ka deklaruar se pezullimi i dialogut strategjik me SHBA-në shënon periudhën më të errët në historinë e Kosovës.
Postimi i plotë:
Shtetet e Bashkuara të Amerikës do të jenë përjetësisht aleati më i rëndësishëm i Kosovës. Ky partneritet është pasuria më e madhe e shtetit tonë. Me SHBA-në e kemi bërë rezistencën paqësore. E kemi bërë luftën dhe e kemi arritur lirinë, pavarësinë dhe shtetndërtimin.
Pezullimi i dialogut strategjik me Kosovën, si pasojë e veprimeve të Qeverisë, shënon periudhën më të errët në historinë e re të Kosovës.
Ky është lajm shumë i keq për ne, por njëkohesisht jam i bindur se nuk ka qenë vendim aspak i lehtë as për qeverinë amerikane.
Shteti dhe populli i Kosovës nga sot është para një sfide ekzistenciale, ku marrëdhëniet me SHBA-në po rrezikohen seriozisht dhe bashkë me to edhe shteti i Kosovës.
Këto marrëdhënie nuk janë vetëm çështje diplomacie, por janë garancia më e fortë për ekzistencën, stabilitetin dhe të ardhmen e Republikës së Kosovës. Unë dua të rikonfirmoj se periudhës së mjegullës, kaosit institucional, polarizimit me aleatë dhe ofendimeve ndaj zyrtarëve amerikanë, po u vjen fundi.
Apeli im publik mbetet i qartë: duhet t’i tejkalojmë egot personale dhe të bëhemi bashkë për ta ruajtur shtetin tonë. Kosovën duhet ta rikthejmë në rrugën euroatlantike, në partneritet strategjik me SHBA-në dhe BE-në.
