Memli Krasniqi, Lumir Abdixhiku dhe Ramush Haradinaj do të zhvillojnë një takim në Ambasadën e Shteteve të Bashkuara të Amerikës, pas nxjerrjes në publik të vendimit të SHBA-së për ta pezulluar Dialogun Strategjik me Kosovën.
Tre liderët politik kanë nisur takimin me përfaqësues të shtetit amerikan në ora 15:00, në atë që pritet të jetë bisedë e vështirë dhe ku pritet të diskutohen një varg çështjesh që lidhen me raportet SHBA-Kosovë, të cilat kanë prekur pikën më të ulët.
Vendimi i Shteteve të Bashkuara të Amerikës për të pezulluar Dialogun Strategjik me Kosovën erdhi si pasojë e “shqetësimeve për vepriamet e qeverisë në detyrë, që kanë rritur tensionet dhe jostabilitetin”, duke tkurrur mundësitë e SHBA-së për të punuar bashkë me Kosovën.
Në njoftimin e ambasadës thuhej po ashtu që qeveria amerikane mbetet e përkushtuar për t’i çuar përpara raportet me popullin e Kosovës, por që veprimet dhe deklaratat e fundit të kryeministrit në detyrë “kanë vënë në pikëpyetje përparimin shumëvjeçar”.
Ky vendim i SHBA-së ka shkaktuar reagime të fuqishme përgjatë gjithë spektrit politik në vend. Partia Demokratike e Kosovës ka kërkuar që “të gjitha forcat properëndimore, me vetëdije shtetformuese, të bashkohen dhe t’i japin Kosovës një qeveri të përgjegjshme, e cila e rikthen vendin në rrugëtimin e sigurt të integrimit euroatlantik”.
I ashpër në qëndrime ka qenë edhe lideri i Lidhjes Demokratike të Kosovës, Lumir Abdixhiku, i cili ka ftuar për bashkim të qytetarëve duke i dhënë fund, sipas tij, “kësaj çmendurie politike dhe të ndërtojmë shtetin që e kemi merituar gjithmonë – para se të bëhet vonë për të gjithë”.
Çka ofron Dialogu Strategjik?
Procesi në vetvete përfshin diskutime të nivelit të lartë mes dy vendeve që zhvillohen ose në Uashington, ose në vendin përkatës.
Dialogu Strategjik shpesh fokusohet në çështje strategjike si siguria, marrëdhëniet ekonomike, tregtia, teknologjia, stabiliteti rajonal dhe sfidat globale si ndryshimet klimatike apo lufta kundër terrorizmit.
Diskutimet në kuadër të Dialogut Strategjik synojnë formësimin e politikave dhe partneriteteve afatgjata, ku diskutimet zakonisht zhvillohen periodikisht, me mekanizma formalë për ndjekjen dhe zbatimin e vendimeve.
Dialogu Strategjik në përgjithësi luan një rol të rëndësishëm në promovimin e mirëkuptimit, zgjidhjen e mosmarrëveshjeve dhe ndërtimin e aleancave që avancojnë interesat e SHBA-së dhe stabilitetin global./Albanianpost
