Presidentja e vendit, Vjosa Osmani, në konferencën për media të mbajtur së fundmi deklaroi se pas ‘sulmeve’ nga disa gazetarë po e rimendon sërish kandidimin për këtë post.
“A do të rikandidojë, do të vendosi në ndërkohë. Sa po them të marrë një pushim, po çohen do gazetarë po më sulmojnë e po më bindin mos me u ndalë e me vazhdu”, tha dje Osmani raporton “Gazeta Blic”.
Në lidhje me këtë deklaratë të Osmanit ka folur për “Gazeta Blic”, publicisti i njohur, Shkëlzen Maliqi.
Maliqi theksoi se problemi kryesor është se Osmani nuk ka mundësi të kandidohet vetë për Presidente por nga një subjekt tjetër politik i cili bën marrëveshje me partitë tjera, për ndarjen e posteve kryesore.
Ai theksoi se Osmani në vitin 2021 ka qenë në pozitë më të mirë dhe sipas tij një ‘pazar’ i tillë vështirë se mund të bëhet tani.
“Edhe një mandat për Vjosa Osmanin? Si njëra ndër politikanet më të votuara në të kaluarën, sigurisht se ajo ka mjaft përkrahës, ndër ta edhe gazetar, që e shohin si kandidate.Por, ajo i referohet nxitjes, për t’u vetëkandiduar. Nuk ka rëndësi nëse dikush e nxit, por, fakti se ajo vetë synon vazhdimin e karierës politike, çka nuk e ka fshehur, vetëm se me duket se ajo ka qenë në mëdyshje, mbase është edhe sot, në cilin drejtim duhet të angazhohet, për një mandat të dytë në Presidencë, apo për poste qeveritare. Problemin esencial që e ka është se ajo nuk ka mundësi që të kandidohet vetë për Presidente, kjo nuk është garë që e vendos drejtpërdrejt elektorati, por duhet të “kandidohet” nga ndonjë subjekt politik parlamentar, i cili bën marrëveshje me partitë tjera, për ndarjen e posteve kryesore, pos presidentit në “Pazar” janë edhe Kryeministri edhe kryetari i Kuvendit (zgjedhjet e përgjithshme me gjasa do të përsëriten)”
“Në vitin 2021 Vjosa ka qenë në pozitë më të mirë, e kishte mbas veti gjysmën e elektioratit të përçarë të LDK-së si dhe një subjekt hibrid politik Lëvizjen Guxo, dhe i kishte letrat e forta për të negociuar me Albin Kurtin çfarë posti dëshiron në koalicionin parazgjedhor që e patën arritur. Peshqeshi që ia dha Vjosa Osmani Vetëvendosjes ishin rreth 100 mijë vota dhe fitorja bindëse me 51 %. Nëse edhe sot do të ishte garantuese për këto 100 mijë vota, Vjosa do të mund të zgjidhte se a e do mandatin e dytë si Presidente, apo ndonjë post të spikatur në qeveri. Pas zgjedhjeve të 9 shkurtit, ku vota e koalicionit fitues të vitit 2021 u tret, morri rreth 10 % më pak, supozohet se votat e “munguara” janë kryesisht votat ish LDK-istëve që Vjosa i çoj peshqesh Albinit, me 9 shkurt ato u kthyen te Lumiri.Kjo do të thotë se një pazar i ri i ngjashëm me atë ti vitit 2021, vështirë se mund të bëhet” tha Maliqi për “Gazeta Blic”.
Maliqi renditi disa nga faktorët të cilët mund t’a bëjnë që Osmani të mos mund rikandidohet për Presidente.
Ai theksoi se tashmë Osmani nuk e kontrollon më Lëvizjen Guxo, në zgjedhjet lokale pritet një ‘goditje’ për koalicionin VV-Guxo-Alternative, dhe se rikandidimi i saj por edhe e gjithë karriera e saj si politikane mund të dërmohet rëndë.
“Kjo edhe për faktin se Vjosa nuk po e kontrollon më Lëvizjen Guxo, atë e mbajnë tani Donika Gërvalla dhe Faton Peci, të shkrirë më thellë në strukturat e VV-së, kështu që Vjosa nuk mundet me hy në negociata komode me Albinin pa pajtimin e Guxo. Për më shumë, pasi që zgjedhjet lokala mbahen pas një muaji, dhe aty pritet edhe një goditje dëshpëruese për koalicionin VV-Guxo-Alternativa (as para katër viteve nuk patën fituar më shumë se katër komuna, tani mund të dalin edhe më keq!) krejt konstrukti i një marrëveshjeje serioze mes Albinit dhe Vjosës mund të bie në ujë, dhe jo vetëm ri-kandidimi i Vjosës për presidente, por edhe kariera e saj prej politikane, mund të dërmohet rëndë” deklaroi ai.
Publicisti Maliqi e cilësoi Osmanin si Presidente shumë të dobët e cila sipas tij i ka mbajtur ‘ison’ Kurtit.
“Përndryshe, si presidente, Vjosa Osmani ka qenë shumë e dobët dhe e padukshme, duke ia mbajtur tanë kohën ison Albin Kurtit. Vetën nga viti i kaluar pat filluar të ndahet kujdesshëm nga një pjesë e politikave të pamatura të Albinit në raport me SHBA dhe BE, por jo edhe nga premisat populliste. Në të vërtetë ajo e shfrytëzonte rolin e zëvendësueses që ia jepnin ndërkombëtarët për konferenca dhe vizita shtetërore, ku Albinin nuk donin ta shihnin si pjesëmarrës. Edhe ky afrim me aleatët strategjik mbase ka qenë në funksion të sigurimit të përkrahjes të jashtmne për ambicjet e saj, por besoj se edhe ajo vetë e ka kuptuar, edhe nga qëndrimi në SHBA, pesha e saj politike në sytë e diplomatëve nuk është gjithaq e respektueshme, përderisa në vetë skenën politike të Kosovës ka mbetur relativisht e izoluar, pothuajse e djegur si opsion.Sanksionet që po shtohen ndaj qeverisë në detyrë, konkretisht ndaj Albin Kurtit, si ky lajm i posarritur për ndërprerjen, për periudhë të pacaktuar (!) të bisedimeve strategjike të qeverisë amerikane me qeverinë e Kosovës, janë alarm i fundit për këndellje nëse jo e vetëpolitikanëve, atëherë të elektoratit që mashtohet nga politikat miope populliste, përfshi këtu edhe hipokrizinë e presidentes aktuale” tha Maliqi.
