Shtëpia evropiane e futbollit, UEFA, pritet që javën e ardhshme të marrë vendim për pezullimin ose jo të Izraelit, por shumica e anëtarëve të komitetit ekzekutiv të saj merret vesh se janë pro kësaj mase, raporton gazeta e njohur britanike, “The Times”.
Një panel i këshilltarëve në Kombet e Bashkuara u kanë bërë thirrje FIFA-s dhe UEFA-s që ta pezullojnë Izraelin, pasi një Komision Hetues i OKB-së konkludoi se Izraeli është duke kryer gjenocid në Gaza, thuhet në artikullin e të përditshmes britanike.
Burimet i kanë thënë gazetës se UEFA do të marrë një vendim javën e ardhshme dhe se një shumicë e madhe e anëtarëve ekzekutivë si dhe federatave të vendeve anëtare janë në favor të pezullimit – duke e përmendur pezullimin e Rusisë nga garat evropiane që nga fillimi i pushtimit të plotë të Ukrainës në vitin 2022.
UEFA, organizatë në të cilën Izraeli është anëtar që nga viti 1994, ka mbajtur diskutime serioze në nivelin më të lartë këtë javë për veprimet e Izraelit në Gaza dhe për atë se si duhet të reagojë institucioni më i lartë evropian i futbollit ndaj kësaj situate.
Gazeta “The Times” muajin e kaluar mori vesh se disa klube evropiane të futbollit e kishin pyetur UEFA-n nëse ekzistonte ndonjë mënyrë që ato ta shmangin ballafaqimin me ekipe izraelite.
Pezullimi i Izraelit nga UEFA-ja do ta shtonte presionin ndaj shtëpisë botërore të futbollit, FIFA, që ta bënte hapin e njëjtë, por kjo organizatë është në pozitë të vështirë për shkak të lidhjeve të ngushta të presidentit të saj, Gianni Infantino, me presidentin amerikan, Donald Trump, i cili është mbështetës i palëkundur i Izraelit.
Megjithatë, edhe nëse FIFA nuk e pezullon Izraelin, pezullimi nga UEFA praktikisht do të nënkuptonte se ky shtet nuk do të mund të kualifikohej për Botërorin e vitit të ardhshëm.
