Prokuroria Speciale e Republikës së Kosovës ka ngritur aktakuzë ndaj dy personave, të identifikuar me inicialet D.B. dhe E.B., për veprën penale “Nxitja e përçarjes dhe mosdurimit”.
Sipas njoftimit zyrtar, të pandehurit akuzohen se përmes rrjeteve sociale “Facebook” dhe “TikTok” kanë shpërndarë përmbajtje që nxisin urrejtje ndërmjet grupeve fetare, duke promovuar ideologji ekstreme dhe duke përkrahur publikisht organizatën terroriste ISIS.
Në aktakuzë thuhet se të pandehurit kanë publikuar thirrje për pjesëmarrje në luftëra të armatosura dhe në atë që e kanë cilësuar si “luftë për xhihad”. Gjithashtu, ekziston dyshimi i bazuar se ata kanë vendosur flamuj të ISIS-it mbi kulmin e shtëpisë së tyre dhe kanë shkruar grafite me shkronja arabe në muret e shtëpisë, veprime që konsiderohen si kërcënim për rendin publik.
D.B. akuzohet se ka shfaqur qëndrime refuzuese ndaj personave që nuk e praktikojnë fenë sipas bindjeve të tij dhe se ka postuar materiale me përmbajtje fyese ndaj pjesëtarëve të Bashkësisë Islame të Kosovës.
Prokuroria i ka propozuar Gjykatës Themelore në Prishtinë që të dy të pandehurit të shpallen fajtorë dhe të vazhdohet masa e paraburgimit për D.B. dhe ajo e arrestit shtëpiak për E.B./Reporteri.net/
