Agjencia e Ushqimit dhe Veterinarisë(AUV), ka reaguar pas raportimeve të fundit mbi praninë e peshkut të infektuar me krimba në tregun e Kosovës, ku në një përgjigje për Metro AUV ka njoftuar se është në përgaditje për të asgjësuar 35,170 kilogramë peshk, të cilët janë konstatuar me praninë e parazitëve.
Sipas AUV-it ky hap po ndërmerret në përputhje me vendimin e Gjykatës Komerciale në Prishtinë. Agjencia theksoi se sasia e bllokuar ndodhet aktualisht në depon e kompanisë dhe nuk është hedhur në treg.
“Në lidhje me këtë çështje, kemi vendimin e Gjykatës Komerciale në Prishtinë – Dhoma e shkallës së dytë, sipas Aktvendimit Nr. të lëndës 2025:134825 me nr. dokumenti 07679680. Në përputhje me këtë vendim, Autoriteti i Ushqimit dhe Veterinarisë (AUV), në bashkëpunim me kompaninë përkatëse, janë duke ndërmarrë përgatitjet për asgjësimin e 35,170 kilogramëve peshk, me qëllim garantimin e sigurisë shëndetësore të konsumatorëve dhe respektimin e standardeve ndërkombëtare. Ky proces është i domosdoshëm për mbrojtjen e shëndetit publik dhe ruajtjen e integritetit të tregut ushqimor në Kosovë.”, thuhet në përgjigjen e AUV-it, e cila shton se publiku do të njoftohet në momentin e asgjësimit.
Ndërkaq, të enjten në një hulumtim Vox Kosova kishte zbuluar më herët se vendimet e AUV për asgjësimin e produkteve me parazitë nuk ishin zbatuar plotësisht, dhe se qytetarët kishin konsumuar peshk me krimba për vite të tëra, dhe se për këtë kishte pasur informata edhe vetë Ministri në detyrë i Bujqësisë Faton Peci.
