Policia e Kosovës tashmë ka vënë nën llupën e saj spitalin “Kestrina”, ku u operua 20-vjeçarja nga Lipjani.
Familja e saj pretendon se mjekët, pa dijeninë e pacientes, i hoqën tubin e djathtë të vezoreve.
Kallëzimi penal, të cilin e ka ngritur familja e të resë, ka vënë në këmbë organet e ndjekjes, të cilët i bëjnë me dije emisionit se rasti është duke u hetuar
Oda e Mjekëve të Kosovës njoftoi se ende nuk ka pranuar asnjë ankesë nga pacientja në fjalë.
Sipas tyre, pa një ankesë të tillë nuk mund të fillojnë hetimet për zbardhjen e asnjë dyshimi.
Asdren Bytyqi, njohës ligjor, thekson se çdo operim duhet të bëhet vetëm me autorizimin e pacientit.
Nëse ky autorizim mungon, ndërhyrja mund të shkaktojë komplikime shëndetësore për pacientin dhe pasoja ligjore për mjekun.
Ai shton se mjeku mund të ndërhynte vetëm te cistat për të cilat kishte autorizim, ose te ato që tejkalimi i tyre mund të shkaktonte probleme serioze shëndetësore, por jo pa pranimin e pacientit.
Në këso raste avokati thotë që pala e dëmtuar edhe mund të bëjë padi tek organet e drejtësisë.
Në anën tjetër spitali nuk ka ofruar detaje për rastin nën arsyetimin e mbrojtjes së të dhënave të pacientit.
