Kur dikush thotë se është me profesion doktor, presupozohet se është edhe intelektuali, i matur dhe i sjellëm. Por jo krejt këto cilësi del se i ka stomatologu, Fitim Xhoxhaj i ordinancës “Inna Dental Clinic”, pasi që i njëjti ka penguar inspektorët shëndetësorë në kryerje të detyrës zyrtare, duke i ofenduar dhe kërcënuar, sa që të njëjti është dashur të kërkojnë asistimin e policisë. Kështu thuhet në një vendim të Inspektoratit Shëndetësor që e ka siguruar Veriu.info.
Inspektorët Shëndetësorë të Ministrisë së Shëndetësisë më 18 janar 2026 kanë realizuar inspektim në ordinancën “Inna Dental Clinic” në Fushë Kosovë me pronare Evelina Osmani – shtetase e Shqipërisë, pas një ankese të pranuar nga profesionistja shëndetësore Esma I., e cila ka denoncuar këtë klinikë për shfrytëzim të padrejtë dhe bllokim të licencës profesionale.
Veriu.info ka siguruar vendimin e Inspektoratit Shëndetësor që mban datën 26 janar 2026 që është nxjerrë pas inspektimit të realizuar një javë më herët, ku “Inna Dental Clinic” është gjobitur me 10 mijë euro për shkelje të Ligjit për Shëndetësi, pasi që është konstatuar se e ushtron veprimtarinë pa përmbushur kushtet ligjore.
Në vendim bëhet e ditur se Dr. Fitim Xhoxhaj që është bashkëshorti i pronares së ordinancës, ka penguar, ofenduar e kërcënuar inspektorët shëndetësorë.
“Inspektorati shëndetësor u pengua nga Dr. Fitim Xhoxhaj për kryerjen e inspektimit kërkonte vendim nga prokurori edhe pse nuk ishte person i autorizuar i këtij institucioni. Dr. Fitim Xhoxhaj ofendonte Inspektoratin me fjalë të cilat nuk duhet të përdor një mjekë dhe tanë kohën na kërcënonte . Inspektorati Shëndetësor kërkoj asistence nga stacioni i policisë Fushë Kosovë për realizimin e inspektimit”, thuhet në vendimin e siguruar nga Veriu.info.
Pas asistencës së policisë, inspektorët kanë realizuar inspektimin në “Inna Dental Clinic”, ku kanë gjetur se në këtë klinikë ofroheshin shërbime të implantologjisë-kirurgjisë orale dhe shërbime të ortodoncisë nga Dr. Fitim Xhoxhaj, por i cili nuk kishte përgatitje profesionale për ofrimin e tyre. Madje, në esencë këto shërbime ishin krejtësisht ilegale për këtë ordinancë, pasi që “Inna Dental Clinic” nuk ishte e licencuar për ofrimin e tyre nga Divizioni për Licencim dhe Akreditim i Ministrisë së Shëndetësisë.
“Gjatë inspektimit janë zhvilluar biseda me përfaqësues të IPSh-së. Bazuar në dokumentacionin në dispozicion dhe verifikimin e tij, është evidentuar se në këtë institucion ofrohen shërbime me karakter specialistik të implantologjisë-kirurgjisë orale, dhe shërbimi për ortodonci. Në regjistrin e pacientëve figurojnë ndërhyrje të karakterit specialistik, ndërsa në ambientet e punës janë identifikuar pajisje specifike për përdorim në trajtime implantologjike dhe ortodontike. Sipas deklaratës së znj. Evelina Osmani, shërbimet specialistike për implantologji dhe ortodontike kryhen nga Dr. Fitim Xhoxhaj, doktor i stomatologjisë, mirëpo nuk u ofrua dokumentacion që vërteton përgatitjen e tij profesionale apo ndonjë kualifikim shtesë për ofrim e këtyre shërbimeve specialistike. Bazuar në shërbimet e paraqitura në me sistemin e DLA-së ky institucion nuk është i licencuar për ofrimin e shërbimeve specialistike të Implantologjisë dhe Ortodoncisë siç kërkohet me Ligjin për Shëndetësi dhe aktet nënligjore përkatëse”, thuhet në vendimin për gjobitjen e “Inna Dental Clinic”.
Në fund të vendimit inspektorët shëndetësorë theksojnë faktin se “Inna Dental Clinic” nuk ka plotësuar asnjë rekomandim të dhënë nga Inspektorati Shëndetësor.
Veriu.info ka tentuar të marrë një qëndrim nga “Inna Dental Clinic” Sh.P.K. për këtë vendim të Inspektoratit Shëndetësor, por deri në momentin e publikimit të artikullit nuk ka pranuar përgjigje për pyetjet e dërguara.
LEXONI EDHE:
