Nga apostull i moralit politik, në shembullin e keq të asaj që dikur e shante te populli për ish-Presidentin Thaçi…
Rrugëtimi paradoksal i kreut të Vetëvendosjes, Albin Kurti, nga foltorja e Kuvendit të Kosovës vetëm disa vite më parë – ku sulmonte me gjithë arsenalin e tij retorik ish-presidentin Hashim Thaçi si “të paaftë” e “të dështuar” për kthimin nga Washingtoni, siç pretendonte ai, pa takim me Presidentin amerikan, pa marrëveshje e pa sjellur investime – deri te vizita e fundit e tij në ShBA, që më shumë i ngjan një ekskursioni privat të mbushur me poza e shëtitje, shfaqet sot si një nga bumerangët më të pamëshirshëm të karrierës së tij politike.
Viti 2020
Kurti shpërthente nga foltorja e Kuvendit me akuza e sulme brutale kundër Thaçit për “mungesë takimesh me zyrtarë të lartë amerikanë” dhe për një vizitë në Uashington që – sipas tij – nuk kishte sjellë as marrëveshje, as investime.
“Të shkosh në Shtëpi të Bardhë si president te mos e takosh presidentin amerikan e as zëvendëspresidentin, e të kthehesh pa marrëveshje politike dhe pa sjellë ndonjë investim në ekonomi është debakël.”
E pasi kemi qeveri të re duhet të kemi president të ri. Unë nuk jam antiamerikan, por më lejoni të them se presidenti është antieuropian. Pikërisht në kohën kur presidenti deklarohet se është antieuropian mua më akuzojnë si antiamerikan. Unë i dua edhe ShBA-në edhe BE-në. Na nevojiten të dyja. Presidenti po sillet më keq me BE-në se me Serbinë.”, deklaronte Kurti.
Në të njëjtin monolog, Kurti thoshte se ai do të ishte ndryshe: i gatshëm të shkonte në Uashington, të diskutonte “të gjitha çështjet” dhe t’i shërbente Kosovës me marrëveshje të pranueshme për ShBA, BE dhe rajon.
“Unë jam i gatshëm të shkoj në Ëashington DC të SHBA-së si kryeministër me ekipin tim bashkë edhe me kryeparlamentaren tonë, znj. Vjosa Osmani dhe t’i diskutojmë të gjitha çështjet. Kemi nevojë për një proces drejt një marrëveshje të pranueshme për SHBA-në, BE-në dhe rajonin”
12 Shtatori 2025: Shuplaka amerikane
Më 12 shtator 2025, Kosova mori shuplakën më brutale diplomatike ndonjëherë. Shtetet e Bashkuara të Amerikës pezulluan Dialogun Strategjik me Kosovën. Në atë njoftim, aleati më i madh i Kosovës e përmendi kreun e Vetëvendosjes, Albin Kurti si fajtor të drejtpërdrejtë për çarje të raporteve.
Dy javë pas asaj që duhet të kishte qenë momenti më i turpshëm i karrierës së tij, Albin Kurti u nis për në Amerikë – jo me peshën e një vizite shtetërore, por, deri më tani, të një ekskursioni privat.
Që nga 25 shtatori, kur Zyra e Kryeministrit njoftoi “nisjen për ShBA”, kalendari i Kurtit u mbush me takime periferike dhe fotografi me maksimumi ndonjë kongresist, si Keith Self, të pritur edhe atë në ambientet e Konsullatës së Kosovës në New York.
Faqja e ZKM prodhoi me bollëk njoftime për takime me liderë e diplomatë të shteteve zor të njohura për popullin në kuadër të Javës së Nivelit të Lartë të Asamblesë së Përgjithshme të Kombeve të Bashkuara, por asnjë për ndonjë takim me peshë me zyrtarë të lartë amerikanë.
Gjatë këtij diskutimi me studentë, Kurti u lëshua edhe në teza skandaloze: se ShBA është kundër sundimit të ligjit dhe sovranitetit në veri – prandaj, sipas tij, u pezullua pa afat Dialogu Strategjik Kosovë–ShBA. Në kulm të kësaj logjike, ai pretendoi – me “me falni për sinqeritetin” – se plani amerikan qenka të mbajë të kënaqur Serbinë në kurriz të Kosovës, me shpresën për ta larguar nga Federata Ruse.
