Deputeti dhe nënkryetari i Listës Serbe, Igor Simiq, ka njoftuar se partia e tij do të ankohet ndaj vendimit për zgjedhjen e Nenad Rashiqit si nënkryetar i Kuvendit të Kosovës, duke e cilësuar atë si vendim që bie ndesh me Kushtetutën dhe aktgjykimin e Gjykatës Kushtetuese, raporton Danas, transmeton Gazeta Express.
Simiq tha se Rashiqin nuk e ka zgjedhur populli serb. “Ai është vetëm edhe një anëtar tjetër i Vetëvendosjes. Rashiqin e kanë futur me forcë si deputet, e tani me të njëjtin mënyrë e kanë shpallur nënkryetar”, deklaroi ai.
Duke cituar aktgjykimin e Gjykatës Kushtetuese të Kosovës, Simiq theksoi se “fituesi i zgjedhjeve nga komuniteti serb ka të drejtën ekskluzive të propozojë kandidatin për nënkryetar të Kuvendit nga komuniteti serb”.
Sipas tij, kjo e drejtë i takon Listës Serbe. “Meqë Rashiq nuk është propozuar nga kjo parti, zgjedhja e tij për nënkryetar përbën shkelje të vendimit të Gjykatës Kushtetuese”, argumentoi Simiq.
Nuk është sqaruar ende se kur do të paraqitet ankesa zyrtare dhe para cilit organ do të drejtohet.
