Për plot tri herë, shqiptarët u bashkuan në protesta për të kërkuar drejtësi për katërshen e Ushtrisë Çlirimtare të Kosovës, që po mbahen në Hagë.
E para u mbajt më 7 gusht në Prishtinë, ku mijëra qytetarë dolën në sheshe me flamuj e pankarta.
Më pas, më 14 shtator, zëri u dëgjua në Hagë, para ndërtesës së Gjykatës Speciale.
Ndërsa e treta, më 17 tetor, mbushi bulevardet e Tiranës, në një manifestim madhështor kombëtar.
Këto tubime u bashkuan në një thirrje të vetme e të fuqishme “Drejtësi për Çlirimtarët!”.
Zhvillimet në Hagë
Gjykata hodhi poshtë shumicën e provave të mbrojtjes së Jakup Krasniqit, me arsyetimin se ato lidhen me krimet serbe – të cilat, sipas Speciales, “nuk kanë lidhje direkte” me akuzat kundër ish-drejtuesve të UÇK-së.
“Paneli së pari vëren se më parë ka vendosur që provat për krimet e dyshuara të kryera nga forcat serbe janë përgjithësisht të parëndësishme për akuzat kundër të akuzuarit. Mbrojtja e Krasniqit gjithashtu nuk ka arritur të vërtetojë se incidentet e përshkruara në këtë pikë janë të lidhura me ndonjë nga akuzat ose faktet në Aktakuzë, ose se ato lidhen me ose janë provuese të organizimit ose aktivitetit të UÇK-së në zonë në një kohë ose vend që lidhet me akuzat”.
Pas kësaj, Dhomat e Specializuara njoftuan edhe anulimin e seancave të planifikuara për javën e ardhshme (27–30 tetor).
