Në rastin ndaj Hashim Thaçit, Bashkim Smakajt, Isni Kilajt, Fadil Fazliut dhe Hajredin Kuçit, të akuzuar për vepra penale kundër administrimit të drejtësisë, Zyrës së Prokurorit të Specializuar i është lejuar që të zbulojë materiale shtesë të cilat tashmë ajo i ka përfshirë përkohësisht në listën e provave të cilën e ka dorëzuar së bashku me dosjen paraprake.
Vendimi është marrë më 17 tetor 2025 nga gjyqtarja e procedurës paraprake, Marjorie Masselot, raporton “Betimi për Drejtësi”.
Sa i përket aspektit kronologjik, gjyqtarja Masselot kishte nxjerrë një vendim i cili përcaktonte afate për zbulimin e çdo materiali nga ana e Prokurorisë i cili nuk kërkonte redaktime standarde deri më 17 shkurt 2025.
Kurse më 19 shtator, Prokuroria kishte kërkuar autorizim për të zbuluar disa materiale shtesë të kufizuara. Në të njëjtën datë, kishte dorëzuar edhe dosjen paraprake me listën e provave, duke përfshirë përkohësisht edhe materialet shtesë në të.
Sipas Prokurorisë, këto materiale janë të dhëna të nxjerra nga pajisjet elektronike të zbuluara më parë, si dhe janë shtesa që ofrojnë qartësi për materialet të cilat janë zbuluar më parë.
Prokuroria ka thënë se duhet dhënë autorizimi që të shtohen në listën e provave këto materiale shtesë, pasi ato nuk shkaktojnë paragjykim ndaj të akuzuarve, janë në interes të drejtësisë dhe ekzistojnë arsye të vlefshme për këtë.
Përveç kësaj, Prokuroria ka thënë se ato janë të kufizuara në vëllim dhe do të përmirësojnë kuptimin e përgjithshëm të provave të Prokurorisë, si dhe kanë lidhje me materialet e rëndësishme që kanë vlerë provuese për akuzat.
Prokuroria argumenton se meqë procedurat janë ende në fazën paraprake, mund të vazhdojë të mbledhë dhe zbulojë prova nën mbikëqyrjen e përgjithshme të gjyqtares së procedurës paraprake.
Në anën tjetër, në një përgjigje të përbashkët, mbrojtja e pesë të akuzuarve ka kundërshtuar kërkesën e Prokurorisë. Ata gjithashtu kanë ngre shqetësime për faktin se këto materiale tashmë janë përfshirë përkohësisht në listën e provave, të dorëzuar nga Prokuroria.
Sipas mbrojtjes së të akuzuarve, një veprim i tillë nuk përfshihet në kuadrin ligjor të DhSK-së dhe se Prokuroria mund të përfshijë në listën e saj të provave vetëm artikuj të zbuluar më parë brenda afatit të caktuar nga trupi gjykues.
Mbrojta thotë se përfshirja e materialeve shtesë në listën e provave të Prokurorisë, do të kërkonte një kërkesë për ndryshimin e kësaj liste, e të cilën Prokuroria s’e ka paraqitur.
Sipas mbrojtjes, rregullat mund të mos lejojnë fare ndryshimin e listës së provave në këtë fazë.
Si rrjedhojë, mbrojtja ka kërkuar që këto materiale të jenë të përjashtuara nga lista e provave e cila është dorëzuar tashmë nga Prokuroria, si dhe të udhëzohet kjo e fundit që të përditësojë listën e provave dhe dosjen paraprake në bazë të kësaj.
Andaj, mbrojtja kërkon që të hudhet poshtë kërkesa e Prokurorisë, me arsyetimin se është e vonuar dhe nuk ka asnjë shpjegim për vonesën, pasi sipas tyre, shumicën e materialeve Prokuroria i ka pasur në posedim përpara afatit fillestar për zbulim e që ka qenë 17 shkurti 2025.
Po ashtu, sipas mbrojtjes, kjo kërkesë nuk pasqyron asnjë rrethanë që mund ta bëjë të vlefshme, është e padrejtë pasi sipas tyre do e cenonte aftësinë e mbrojtjes për t’u përgatitur për gjykim dhe do të minonin thellësisht drejtësinë e procedurave.
Në kundërpërgjigjen e saj ndaj mbrojtjes, Prokuroria thotë se rregullat dhe jurisprudenca e DhSK-së tregon se shtimi i provave në fazën paraprake duhet të lejohet dhe të trajtohet me fleksibilitet të përshtatshëm.
Për të vendosur për një kërkesë të tillë, sipas Prokurorisë, është nën përgjegjësinë e gjyqtares së procedurës paraprake si dhe kërkesa për shtimin e këtyre materialeve në listën e provave është dorëzuar përpara se të dorëzohet kjo listë.
Veç kësaj, Prokuroria i kundëragrumenton mbrojtjes duke thënë se kërkesa është paraqitur me kohë dhe lidhet me zbulimin e materialeve që janë të rëndësishme për akuzat në këtë çështje, si dhe nuk shkaktojnë paragjykim ndaj mbrojtjes.
Në anën tjetër, gjyqtarja e procedurës paraprake ka konstatuar se Prokuroria ka treguar arsye të vlefshme që e justifikojnë ndryshimin e afatit të 17 shkurtit 2025, për qëllime të zbulimit të materialeve shtesë.
Sipas gjyqtares Masselot, këto materiale ndonëse nuk janë të kufizuara në numër, ato janë të kufizuara në shtrirje, vëllim dhe kompleksitet. Po ashtu, ka thënë se këto materiale nuk paraqesin aspekte të reja të çështjes së ZPS-së, por kryesisht plotësojnë, sqarojnë ose ofrojnë përkthime të artikujve të zbuluar më parë.
Gjyqtarja ka konstatuar se pavarësisht se procedurat paraprake kanë hyrë në një fazë të avancuar, çështja ende nuk i është kaluar një trupi gjykues dhe se nuk është caktuar data për fillimin e paraqitjes së provave nga Prokuroria, Në këtë kontekst, Masselot, ka vlerësuar se ekziston kohë e mjaftueshme për shqyrtimin e materialeve shtesë përpara fillimit të procesit gjyqësor.
Masselot ka konstatuar se kërkesa e mbrojtjes për një procedurë formale të ndryshimit të listës së provave është e panevojshme. Ka arsyetuar se meqë lista e provave ende nuk ishte dorëzuar, kërkesa për autorizim për të zbuluar materialet shtesë nënkupton edhe përfshirjen e tyre në listën e provave.
Si rrjedhojë, u miratua kërkesa e Prokurorisë dhe u refuzua kërkesa e mbrojtjes për të udhëzuar Prokurorinë që të riparaqes listë të provave dhe dosje paraprake të ndryshuar.
Ndërsa, për materialet që duhet të zbulohen, Prokuroria u urdhërua që ta bëjë këtë deri më 22 tetor 2025.
Ndryshe, Hashim Thaçi ndodhet në Qendrën e Paraburgimit në Hagë që nga nëntori i vitit 2020. Ai është duke u gjykuar për krime lufte, si dhe vitin e kaluar i është ngritur aktakuza kundër administrimit të drejtësisë.
Lidhur me rastin kundër administrimit të drejtësisë, Bashkim Smakaj, Fadil Fazliu dhe Isni Kilaj u arrestuan më 5 dhjetor 2024 në Kosovë dhe u transferuan në objektin e paraburgimit në DhSK, më 6 dhjetor 2024 në bazë të aktakuzës së konfirmuar dhe fletarrestimeve të lëshuara nga Haga.
Ndërsa, Thaçit i është dorëzuar fletarrestimi në objektin e paraburgimit në Hagë më 5 dhjetor 2024, gjithnjë sipas njoftimit të DhSK-së.
Kurse, Hajredin Kuçit i është dorëzuar aktakuza e konfirmuar dhe fletëthirrja për t’u paraqitur para gjykatëses së procedurës paraprake për paraqitjen e parë, e cila u mbajt 9 dhjetor.
Sipas aktakuzës, Thaçi individualisht dhe përmes veprimeve të përbashkëta me grupet; Grupi Fazliu (Fadil Fazliu dhe Fahri Fazliu), Grupin Smakaj (Bashkim Smakaj, Blerim Shala dhe Artan Behrami) si dhe Grupin Kilaj (Isni Kilaj dhe Vllaznim Kryeziu), kanë ndjekur një model të sjelljes për të penguar personat zyrtarë në kryerjen e detyrave zyrtare.
Në aktakuzë thuhet se Thaçi ka udhëhequr dhe marrë pjesë në këto përpjekje përmes vizitave të tij në objektet e paraburgimit gjatë kohës sa ishte i paraburgosur në kuadër të gjykimit të tij për krime lufte dhe krime kundër njerëzimit.
Aty thuhet se anëtarët e Grupit Fazliu, Grupit Smakaj dhe Grupit Kilaj u koordinuan për të ndikuar në dëshmitarët e ZPS-së gjatë vizitave jo të priveligjuara të datave 2 korrik, 9 shtator dhe 6 tetor 2023.
Si rrjedhojë, ndaj Thaçit rëndojnë tri akuza për pengim të personit zyrtar në kryerjen e detyrave zyrtare, tri për shkelje të fshehtësisë së procedurës dhe katër akuza për mosbindje ndaj gjykatës.
Ndërsa, Kilaj, Smakaj dhe Fazliu akuzohen për tentativë të pengimit të personave zyrtarë në kryerjen e detyrave zyrtare dhe mosbindje ndaj gjykatës. Kurse, Kuçi i ka dy akuza për mosbindje ndaj gjykatës.
